Baýyrjan Momyshuly atyndaǵy «Batyr shapaǵaty» belgisi tabystaldy
ASTANA. QazAqparat - Qazaqstan ardagerleri qaýymdastyǵy Astana qalasynda bir top azamatqa Baýyrjan Momyshuly atyndaǵy «Batyr shapaǵaty» belgisin tapsyrdy, dep habarlaıdy QazAqparat.
«Batyr shapaǵaty» belgisiniń ıdeıalyq negizi 1993 jylǵy «Memlekettik nagradalar týraly» zańmen sabaqtasyp, jalpy memlekettik marapattaý mádenıetimen qatar damyp keledi. Bul belgi jyl saıyn otan aldyndaǵy sińirgen eńbegimen erekshelengen azamattarǵa beriledi. Mundaı eńbektiń aýqymy keń – kásipkerlik salasyndaǵy turaqty jumys, qoǵamdyq jáne áleýmettik bastamalar, óndiris pen ekonomıkadaǵy nátıjeli jobalar, jańashyl ıdeıalar men ınnovatsııalyq izdenister, sondaı-aq patrıottyq baǵyttaǵy naqty qyzmet túrleri qamtylady.
Bıylǵy rásimde elge eńbegi sińgen birqatar tulǵa marapattaldy. Olardyń qatarynda ekonomıka jáne bıznes salasyndaǵy belgili tulǵalar da, tehnologııalyq jańashyldyqty damytqan kásipkerler de, áleýmettik salaǵa qoldaý kórsetken qoǵamdyq belsendiler de bar.
Atalǵan rásimde kásipkerlikpen qatar óndiris pen áleýmettik salaǵa serpin bergen tulǵalar da nazardan tys qalmady. Raıymbek Batalovtyń eńbegi tamaq ónerkásibin damytýǵa qosqan úlesimen, otandyq brendterdiń qalyptasýyna yqpal etken jumysymen jáne soǵys pen eńbek ardagerlerin qoldaýǵa baǵyttalǵan bastamalarymen sıpattaldy. Kenes Raqyshevtiń qyzmeti joǵary tehnologııalar, IT jáne fınteh salalaryndaǵy jobalarmen, startaptarǵa ınvestıtsııa salý arqyly jańa jumys oryndaryn qalyptastyrýymen jáne áleýmettik jobalardy qoldaýymen baǵalandy. Budan bólek, medıa salasy arqyly kásipkerlik mádenıetti keńinen nasıhattaǵan Armanjan Baıtasovtyń eńbegi de atap ótildi. Ol Forbes Kazakhstan arqyly bıznes taqyrybyn keń kólemde jarııalaýdyń nátıjesinde kásipkerliktiń qoǵamdyq bedeline yqpal etken tulǵalardyń biri.
Sondaı-aq marapat ıegerleri qatarynda Raıs Agaevtyń esimi de atalady. Ol «FAVORIT» kompanııasynyń negizin qalaýshy kásipker retinde bıznestiń damýyna, kásibı daıarlyq pen kadrlyq jańarýǵa úles qosqan, korporatıvtik áleýmettik jaýapkershilikti júıeli deńgeıde damytýǵa tyrysqan tulǵa retinde sıpattalady. Kompanııanyń avtonaryqta ınnovatsııalyq sheshimder engizýi, jas mamandarǵa múmkindik berýi eńbek naryǵynda jańa tájirıbeni qalyptastyrýǵa yqpal etkenimen erekshelenedi. Sonymen birge qoǵamdyq salada óńirlik damý, áleýmettik-ekonomıkalyq jobalar arqyly qoǵamdastyqtardy qoldaǵan Dosymbek Begalıevtiń qyzmeti de osy marapattyń áleýmettik baǵytyn kórsetetin mysal retinde beriledi.
Bul marapattyń ereksheligi – ony taǵaıyndaý rásiminiń qatańdyǵy. Protsedýra ádildikti qamtamasyz etýge baǵyttalǵan. Aldymen úmitkerdi usyný júredi: uıym nemese eńbek ujymy keminde bes jyldyq qyzmet nátıjelerin dáleldeıtin qujattardy jınap, kandıdatýrany resmı túrde usynady. Odan keıin Ardagerler qaýymdastyǵynyń komıteti kelip túsken materıaldardy qarap, eńbektiń qoǵamdyq salmaǵyn, jańashyldyǵyn, mańyzyn jan-jaqty baǵalaıdy.
Sheshim qabyldanǵannan keıin marapat resmı jıynda tabystalady. Ádette jyl saıyn ár sala boıynsha 10-15 azamat marapatqa ıe bolady. 2023 jylǵy marapattaý kezinde de uıymdastyrýshylar bul belginiń eń aldymen patrıottyq mánin atap ótip, qoǵamdyq birlik pen ulttyq qundylyqtardy nyǵaıtýdaǵy rólin kórsetken.
Jalpy, «Batyr shapaǵaty» belgisiniń qoǵamdyq salmaǵy tek saltanatpen ólshenbeıdi. Onyń negizgi yqpaly – elge qyzmet etýdiń naqty áreket arqyly baǵalanatynyn qoǵam sanasyna ornyqtyrý. Mundaı marapattaý tájirıbesi eńbek mádenıetin kóterip, belsendi azamattyq pozıtsııany yntalandyrady. Nátıjesinde kásipkerlik bastamalarǵa, ınnovatsııalyq jobalarǵa jáne áleýmettik jaýapkershilikke degen suranys artady. Bul óz kezeginde memlekettik deńgeıde ınvestıtsııalyq tartymdylyqty kúsheıtýge, Qazaqstannyń halyqaralyq bedelin nyǵaıtýǵa jáne azamattardyń eldik jaýapkershilik sezimin arttyrýǵa yqpal etedi.
Dáýirjan Sanjaruly
