Eraly Toǵjanov Respýblıkalyq pedagogtar keńesin qurýdy tapsyrdy
NUR-SULTAN. QazAqparat - Qazaqstanda Respýblıkalyq pedagogtar keńesi qurylady. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
«Bilim berý salasyndaǵy negizgi problemalardyń biri bul - barlyq múddeli taraptyń pikirin eskeretin keri baılanystyń jetispeýshiligi. Respýblıkalyq pedagogtar keńesin qurýdy tapsyramyn. Oǵan árbir óńir óz ókilin taǵaıyndaıdy. Pedagogıkalyq keńes búkil pedagogıkalyq qoǵamdastyqtyń únine aınalýy tıis. Bilim berý salasynda qabyldanatyn barlyq sheshimder eń aldymen osy keńeste talqylanýy kerek. Sonymen qatar bilim berý máselesine qatysty barlyq normatıvtik qujattarǵa saraptama júrgizýdi tapsyramyn», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblıkalyq tamyz keńesi barysynda.
Premer-Mınıstr orynbasarynyń aıtýynsha, tárbıe berý jumystary da belgili bir júıelilikti talap etedi. Oqytý protsesi ata-analardy tartý arqyly tálim-tárbıe berýmen júrgizilýi tıis. Balalardy úıirmelermen, sektsııalarmen, qosymsha bilimmen qamtý da ózekti mindet bolyp otyr.
«Balalardyń tek 30,7 paıyzy ǵana qosymsha bilimmen qamtylǵan. Buǵan qosa, ıÝNISEF-tiń balalardyń jaǵdaıyna qatysty saraptamasynda óńirler arasyndaǵy teńsizdik deńgeıine baılanysty tabysy kúnkóris deńgeıinen tómen otbasydan shyqqan balalardyń qosymsha bilimge qoly jetpeıtindigi atalyp ótilgen. Bul máseleni Qazaqstannyń Bala quqyqtary jónindegi ýákile de kóterip júr. Qosymsha bilim berýde jan basyna qarjylandyrýdy zańnamalyq turǵyda bekitýdi qamtamasyz etýdi jáne naqty tetikter ázirleýdi tapsyramyn»,- dedi Eraly Toǵjanov.
