Eraly Toǵjanov oqý-aǵartý salasynyń basty mindetin atady
«Búginde Memleket basshysynyń «Jańa Qazaqstandy» qurý ıdeıasyn iske asyrý mindetteri bilim berý júıesiniń mańyzdylyǵyn erekshe arttyrady. Soǵan oraı jańa talaptar júkteldip otyr. Elimizde 6,7 mln-nan astam bala bar, bul - Qazaqstan halqynyń 35 paıyzy. Biz memleketimizdiń ósip, órkendeýiniń tiregi bolatyn osy jas urpaqtyń jan-jaqty damýyna barlyq jaǵdaıdy jasaýǵa tıispiz. «Jańa Qazaqstandy» qurý - eń aldymen bilimge qushtar, eńbekke adal, qoǵamǵa jaýapty azamattardy qalyptastyrý, osy arqyly qoǵamdyq qundylyqtardy da jańartý. «Jańa Qazaqstannyń» azamattaryn qalyptastyrý balabaqsha, mektep qabyrǵasynan bastalýy tıis. Bul - oqý-aǵartý salasynyń basty mindeti», - dedi E.Toǵjanov Pedagogterdiń respýblıkalyq tamyz konferentsııasynda.
Osy oraıda ol Memleket basshysy bilim berý salasyndaǵy úılestirýdi kúsheıtý maqsatynda Oqý-aǵartý mınıstrligin qurǵanyn eske saldy.
«Jańa oqý jylynan bastap mınıstrlik, oblystyq bilim basqarmalary oqý aǵartý salasynyń, ustazdardyń barlyq potentsıalyn aldymyzǵa qoıylǵan mindetterdi iske asyrýǵa jumyldyrýy tıis. Birinshiden, bilim berý uıymdarynda tárbıe jumystaryn uymdastyrý. Tárbıe jumystary bilim berý protsesiniń negizi komponenti. Tárbıe isin qamtymaǵan bilim – oqýshynyń rýhanı damýyn qamtamasyz etpeıdi, qajetti adamdyq qundylyqtardy qalyptastyrmaıdy. Sondyqtan oqýshylardy tárbıeleý árbir bilim berý uıymdary men muǵalimniń basty jumysy bolýy kerek. Bul is-sharalar ótkizý ǵana emes, kúndelikti oqý protsesiniń negizinde júrgiziletin júıeli jumys. Osy jumystyń ózegi, eń aldymen, bizdiń salt-dástúrlerimiz, rýhanı qundylyqtarymyz bolýy tıis. Túptep kelgende balabaqsha, mektep qabyrǵasyndaǵy berilgen tárbıe elimizdiń bolashaǵyna tikeleı áser etedi», - dedi Úkimet basshysynyń orynbasary.
«Biz bárimiz buǵan múddelimiz, otbasy da, jalpy qoǵam da. Osy maqsatta bıyldan bastap mektep pen ata-ananyń tárbıe protsesindegi ózara jaýapkershiligine arnalǵan «oqýshy - mektep - ata-ana» birlesken jumys formaty engizildi. Bul ata-analar qaýymdastyǵyn mekteptegi tárbıe isine kóptep tartýǵa baǵyttalǵan (ata-analar konsılıýmy). Osy jumystardy jalǵastyrý mańyzdy», - dedi E. Toǵjanov.
