Eraly Toǵjanov Mańǵystaý oblysynyń iri óndiristik nysandarynyń jumysymen tanysty
ASTANA. QazAqparat - Búgin Mańǵystaý oblysynyń ákimi Eraly Toǵjanov birqatar iri óndiristik jáne ónerkásiptik kásiporyndardyń, Aqtaý qalasyndaǵy áleýmettik mańyzdy nysandardyń qurylys jumystarymen tanysty, dep habarlaıdy óńirlik ákimdiktiń baspasóz qyzmeti.
Aldymen aımaq basshysy mýltımodaldyq logıstıkalyq tizbekti quraıtyn, temirjol tarmaqtary arqyly Aqtaýmen baılanysqan «Qorǵas - Shyǵys qaqpasy» AEA qurǵaq porty bolyp tabylatyn «Aqtaý Teńiz Soltústik Termınaly» nysanymen tanysty. Qazirgi ýaqytta «ATST» JShS jylyna 3 mln. tonnaǵa deıin qurǵaq júkti aýystyryp tıeıtin múmkindigi bar zamanaýı kópbaǵytty termınal. Dándi daqyldardy aýystyryp tıeý kólemi jylyna 1,5 mln. tonnany, negizgi júktiń kólemi - jylyna 640 myń tonna metaldy, basqa da júkter - jylyna 620 myń tonnany, konteınerler (TEU) jylyna 240 myń tonnany quraıdy.
Sodan keıin Eraly Toǵjanov ınvestıtsııalardy tartý úshin qolaıly jaǵdaı jasaý boıynsha «Aqtaý teńiz porty» arnaıy ekonomıkalyq aımaǵynyń jumysymen tanysty. Búginde «Aqtaý teńiz porty» AEA aýmaǵynda 30 qatysýshy tirkelip, onyń 14 jobasy qoldanysta. Osy jyly taǵy da 3 jobany iske qosý josparlanyp otyr. Ótken jyly №3 sýbaımaqtyń aýmaǵynda «Azersýn» óndiris jáne logıstıka ortalyǵynyń qurylysy aıaqtalǵan bolatyn.
Kelesi nysandar, 33 shaǵynaýdanda ornalasqan «Mańǵystaý-Arena» sport kesheni, hımııa-bıologııa baǵytyndaǵy Nazarbaev zııatkerlik mektebi boldy.
