Eraly Toǵjanov kórkemdik deńgeıi syn kótermeıtin qoıylymdardyń sahnalanýyn synǵa aldy
Oǵan tıisti ortalyq memlekettik jáne jergilikti atqarýshy organ ókilderi men mádenıet salasynyń mamandary qatysty. Keńes barysynda kıno jáne teatr salasyndaǵy birqatar problemalyq máseleler men olardy júıeli túrde sheshý joldary qarastyryldy.
Búgingi kúni Qazaqstanda 65 teatr bar, onyń ishinde 54-i memlekettik, 11-i jeke menshik. Jalpy Táýelsizdik jyldarynda Qazaqstanda 21 memlekettik teatr ashyldy, 10 teatrǵa jańa ǵımarat salyndy. Teatrlardyń mártebesin kóterý maqsatynda 3 teatrǵa «Ulttyq», 9 teatrǵa «Akademııalyq» statýsy berilgen.
Premer-Mınıstrdiń orynbasary keńes barysynda teatrlarda kórkemdik deńgeıi syn kótermeıtin qoıylymdardyń sahnalanýynyń, tarıhı faktilerdiń burmalanýy faktileri kezdesip otyrǵanyn aıtty. Bul rette ol kórkemdik keńestiń maquldaýynsyz qoıylymdardy iske asyrmaý, kórkemdik keńester quramyna tarıhshy mamandardy engizý qajettiligin atap ótti.
Teatr synshylary ınstıtýtyn damytýdyń mańyzyna toqtaldy. Teatr synshylaryna turaqty qoldaý kórsetýdi tapsyrdy.
Budan bólek, Úkimet basshysynyń orynbasary kınematografııa salasyndaǵy birqatar problemalardy kóterdi. Respýblıkada 110 kınoteatr óz qyzmetin júzege asyrady, onyń ishinde 29-y memlekettik menshikte.
1991 jyldan beri «Qazaqfılm» kınostýdııasymen 600-den asa fılm túsirildi. Degenmen eńbekqorlyqty, azamattyq jaýapkershilikti, otansúıgishtikti, sportty nasıhattaıtyn kartınalardyń áli de jetkiliksiz ekendigi aıtyldy. Bul baǵytta E. Toǵjanov kıno jáne teatr salasyndaǵy qoıylym taqyryptaryn júıeli qundylyqtardyń aıasynda qoıýdy usyndy.
Keńes qorytyndysy boıynsha Premer-Mınıstrdiń orynbasary Mádenıet jáne sport mınıstrligi men óńir ákimdikterine kıno jáne teatr salasyn damytý boıynsha júıeli sharalar qabyldaý týraly birqatar naqty tapsyrmalar berdi.
