Eraly Toǵjanov kópbalaly jáne múgedek bala tárbıelep otyrǵan analardy qoldaý ortalyǵynda boldy

NUR-SULTAN. QazAqparat - Búgin Qazaqstan Respýblıkasy Premer-Mınıstriniń orynbasary E.L. Toǵjanov «Nur-Sultan qalasynyń jumyspen qamtý jáne áleýmettik qorǵaý basqarmasy» MM men Qazaqstan Respýblıkasyndaǵy BUU Balalar qorynyń yntymaqtastyǵy aıasynda qurylǵan «Baqytty otbasy» bilim berý aqparattyq-konsýltatıvtik ortalyǵynda jumys saparymen boldy.

Ortalyqta 10 mamandyq boıynsha bilim alýǵa bolady, sondaı-aq psıholog, zańger, dáriger-terapevt jáne pedıatrdyń konsýltatsııalyq qyzmetteri, arnaıy daǵdylardy úıretý boıynsha túrli kýrstar, jeke ósý men yntalandyrý trenıngteri, taım menedjment týraly bilim beriledi, dep habarlaıdy QazAqpart COVID-19 taralýyna jol bermeý jónindegi vedomstvoaralyq komıssııa Telegram kanalyna silteme jasap.

Oqytýdyń negizgi maqsaty-tulǵanyń adamgershilik-rýhanı damýy, konstrýktıvti qarym-qatynas daǵdylaryn qalyptastyrý, otbasylyq qarym-qatynastardy qurý, kásibı daǵdylardy damytý.

Kezdesý barysynda ortalyqtyń qyzmetimen tanysyp, kópbalaly analardy, jalǵyz basty, sondaı-aq múgedek balalardy tárbıelep otyrǵan analardy qoldaý jáne olardy belgili bir mamandyqtarǵa oqytý, olardyń jumyspen qamtylýyn uıymdastyrý jónindegi jumystyń negizgi ádisteri talqylandy.

Búgingi tańda ortalyqta 1400-den astam áıel tirkelgen. Premer-Mınıstrdiń orynbasary ortalyq tyńdaýshylarymen kezdesýler ótkizdi, olardyń osy baǵyttyń qyzmetin damytý jónindegi usynys-tilekterin tyńdady.

Jumys saparynyń qorytyndysy boıynsha osy baǵytqa jaýapty memlekettik organdarǵa Nur-Sultan qalasyndaǵy «Baqytty otbasy» bilim berý aqparattyq-konsýltatıvtik ortalyǵyn odan ári damytý jóninde tapsyrmalar berildi.