Eraly Toǵjanov karantındi saqtamaýdyń saldaryna qatysty naqty mysaldar keltirdi
NUR-SULTAN. QazAqparat – Úkimet basshysynyń orynbasary Eraly Toǵjanov karantın erejelerin saqtamaýdyń saldaryna qatysty naqty mysaldardy keltirdi, dep habarlaıdy QazAqparat tilshisi.
«Jalpy karantın sharalarynyń saqtalmaýynyń saldary týraly naqty mysaldardy keltire keteıin. Qostanaı oblysynda janazaǵa barǵan bir adam segiz týysyna koronavırýs juqtyrǵan. Sol sekildi Nur-Sultannan koronavırýsqa uqsas belgilerimen Kókshetaýǵa kelgen jigit 15 adamǵa aýrý juqtyrǵan. Ókinishke qaraı, osy jaǵdaıda onyń ákesi men sheshesi qaıtys bolyp ketti. Qaraǵandy oblysynda shaǵyn toıǵa qatysqan 18 adamnyń 16-na koronavırýs juqtyrǵan. Sonymen birge dál sol qalada 200 adam jınalǵan túngi klýbtyń jumys istep turǵany anyqtaldy. Bári de maskasyz, áleýmettik qashyqtyqty saqtamaı júrgen. Shynyn aıtqanda, mundaı mysaldar Qazaqstan boıynsha jetip artylady», - dedi Úkimet basshysynyń orynbasary Eraly Toǵjanov OKQ-da ótken baspasóz máslıhatynda.
Onyń aıtýynsha, eldegi indetti birjolata toqtatý úshin kisi jıylady-aý degen kez kelgen sharaǵa barmaý kerek.
«Tipti bireýdiń qaıǵysyn bólisýge barǵyńyz kelse de meniń oıymsha qazir mindetti túrde barmaı, telefon arqyly sóılesip, kóńil aıtý kerek. Búginde halqymyz olaı da kóńil aıtyp jatyr. Jaǵdaıdy túsinip, qaýipsizdikti saqtap otyrǵan azamattardyń bárine rahmet aıtamyn. Ýaqyt talaby osyndaı. Jaqsy kezeńde bas qosylady. Eger árbir qazaqstandyq bul indetke qarsy kúsh salmasa – memleket te, qoǵam ókilderi de, dárigerler de qutqara almaıdy», - dedi ol.
Eske sala ketsek, keshe Memleket basshysy Qasym-Jomart Toqaev epıdemıologııalyq ahýaldy turaqtandyrý jóninde keńes ótkizip, karantın sharalaryn eki aptaǵa uzartýdy tapsyrǵan bolatyn. Memlekettik komıssııa otyrysynyń qorytyndysy boıynsha Qazaqstanda karantın sharalary eki aptaǵa uzartyldy.
