Eraly Toǵjanov epıdahýal týraly: Áli de bosańsýǵa bolmaıdy

NUR-SULTAN. QazAqparat – QR Densaýlyq saqtaý mınıstrliginiń keńeıtilgen alqa otyrysynda vıtse-premer Eraly Toǵjanov koronavırýsqa qatysty eldegi epıdahýaldy baqylaýda ustaý boıynsha naqty tapsyrmalar berdi, dep habarlaıdy QazAqparat tilshisi.

«Eldegi epıdaýhal vaktsınatsııanyń deńgeıine de baılanysty ekeni túsinikti. Biraz elde aýrýdyń tolqyndary 3 aıǵa deıin jetkeni belgili. Bizde «omıkronnyń» ózin 1 aıdyń arasynda ótkerýge múmkindik boldy. Onyń bári naqty júrgizilgen is-sharalardyń arqasy. Qanshama qarsylyq boldy?! Ony da kórdińizder. Antıvakser degen arnaıy toptar qurylyp, eldiń arasynda keri nasıhat júrgizgenin de jaqsy bilemiz. Soǵan qaramastan el bolyp, halyq bolyp osy sharýany birge sheshtik. Sonyń nátıjesinde qazir bıznes salasy 100 paıyz jumys jasaýǵa múmkindik alyp otyr», - dedi Premer-Mınıstrdiń orynbasary.

Sondaı-aq, ol áli ondaǵan memlekette kornavırýs beleń alyp turǵanyn eske saldy.

«57 memleketke vızasyz kirý múmkindigi paıda boldy. Vaktsına alǵan azamattar ol elderge PTR-testsiz de kire alady. Onyń bári jaqsy jeńildik dep oılaımyz. Biraq endi bosańsýǵa bolmaıdy. Ony ózderińiz jaqsy bilesizder. Áli 35 memlekette koronavırýstyń ósýi baıqalyp otyr. Onyń ishinde kórshi memleketter de joq emes, osy jaǵyn eskerýimiz kerek», - dedi Eraly Toǵjanov.