Eraly Toǵjanov birqatar dárigerge memlekettik nagradalardy tabys etti

NUR-SULTAN. QazAqparat – Premer-Mınıstrdiń orynbasary Eraly Toǵjanov «Deni saý ult» ulttyq medıtsınalyq sammıtinde birqatar medıtsına qyzmetkerine memlekettik nagradalar tabys etti, dep habarlaıdy QazAqparat tilshisi.

«Sizder kún saıyn adamnyń týýymen jáne ólimimen betpe-bet kezdesesizder. Sizderdiń jumystaryńyz únemi alańmen ótedi, erlikti talap etedi. Koronovırýs pandemııasy kezindegi jumys oǵan mysal bola alady. Barshańyzǵa kúndelikti jumys ornynda kórsetetin kásibılik, tabandylyq pen janqııarlyq úshin alǵys aıtqym keledi. Eńbekte tabys pen joǵary jetistikter tileımin. Otbasyńyzǵa densaýlyq, baqyt jáne amandyq tileımin. Bizdiń ortaq mindetimiz – aýrýlarǵa tosqaýyl qoıý, juqpaly aýrýlardyń paıda bolýyna jol bermeý jáne barlyǵyna kómektesý. Óz kezegimizde biz sizderdi qoldaý úshin jáne eńbekterińizdi jeńildetý úshin bar kúsh - jigerimizdi salamyz», - dedi E.Toǵjanov.

Osylaısha, densaýlyq saqtaý salasyn damytýǵa sińirgen eńbegi jáne belsendi qoǵamdyq qyzmeti úshin «Qurmet» ordeni «Genom» klınıkasynyń bas dárigeri, reprodýktolog-dáriger Baıan Ábilmanovaǵa; «Astana» medıtsına ýnıversıtetiniń ishki aýrýlar kafedrasynyń meńgerýshisi Baıan Aınabekovaǵa; A. Syzǵanov atyndaǵy Ulttyq ǵylymı hırýrgııa ortalyǵynyń bólim basshysy Talǵat Demeýovke; M. Ospanov atyndaǵy Batys Qazaqstan ýnıversıtetiniń balalar hırýrgııasy kafedrasynyń professory Bolat Jenalıevke tabystaldy.

Sondaı-aq «Qurmet» ordenin Ulttyq neırohırýrgııa ortalyǵynyń Julyn neırohırýrgııasy jáne shetki júıke júıesiniń patologııasy bólimshesiniń meńgerýshisi Talǵat Kerimbaev; «Astana» medıtsınalyq ýnıversıtetiniń hırýrgııalyq aýrýlar, barıatıkalyq hırýrgııa jáne neırohırýrgııa kafedrasynyń professory Oral Ospanov; Ǵ. Sultanov atyndaǵy Pavlodar oblystyq perınataldyq ortalyǵynyń aǵa medbıkesi Gýlıa Ospanova; Pavlodar oblystyq jedel medıtsınalyq járdem stantsııasynyń dáriger-reanımatology Aıman Temirǵalına jáne Áleýmettik medıtsınalyq saqtandyrý qorynyń Aqtóbe oblysy boıynsha fılıalynyń dırektory Altaı Orazbaǵambetov aldy.

Densaýlyq saqtaý salasyndaǵy belsendi jáne jemisti qyzmeti, meıirimdiligi jáne qaıyrymdylyǵy úshin «Shapaǵat» medalimen Ulttyq ǵylymı-medıtsınalyq ortalyqtyń ýrologııa bóliminiń meńgerýshisi Erbol Ysqaqov marapattaldy.

Sonymen qatar densaýlyq saqtaý salasyndaǵy eńbektegi jetistikteri úshin Semeı qalasynyń Jedel medıtsınalyq járdem aýrýhanasynyń dırektory Erlan Búrkitov «Eren eńbegi úshin» medalin aldy.

Buǵan deıin Qazaqstannyń úzdik medıtsınalyq uıymdary ALTYN SHIPAGER músinshesimen marapattalǵan edi.