Eraly Toǵjanov bilim jáne ǵylym salasyndaǵy jetistikterdi atady

NUR-SULTAN. QazAqparat – QR Premer-Mınıstriniń orynbasary Eraly Toǵjanov bilim jáne ǵylym salasyndaǵy ótken jylǵy basty jetistikterdi atady, dep habarlaıdy QazAqparat tilshisi.

«Bilim jáne ǵylym salasynda ótken jyly aıtarlyqtaı jetistikterge qol jetkizildi. 2021 jyly bilim sapasyn arttyrýǵa arnalǵan «Bilimdi ult» jobasy qabyldandy. 45,2 myń orynǵa arnalǵan 534 balabaqsha ashyldy. 1 015 mektep jańǵyrtýdan ótti, onyń ishinde 921-i aýyl mektepteri. Kolledjderge mamandardy daıarlaýǵa arnalǵan memlekettik tapsyrys 3,5 myńǵa ulǵaıdy. Joǵary oqý oryndary grantynyń sany 10 paıyzǵa artyp, 56 myń grantty qurady», - dedi Úkimet basshysynyń orynbasary Bilim jáne ǵylym mınıstrliginiń keńeıtilgen alqa otyrysynda.

Onyń atap ótýinshe, Memleket basshysy Qasym-Jomart Toqaevtyń tapsyrmasyna sáıkes ázirlengen «Úzdiksiz bilim berý» tujyrymdamasy bekitildi. Stýdentterdiń shákirtaqysy 20 paıyzǵa ósti. 10 myń oryndyq 49 jataqhana paıdalanýǵa berildi.

«Pandemııaǵa qarsy QazVac otandyq vaktsınasy ázirlendi. Jas ǵalymdarǵa «Jas ǵalym» jobasy aıasynda 1 myń grant bólindi. Іrgeli zertteýler men tikeleı qarjylandyrýdy kózdeıtin ǵylym máseleleri boıynsha arnaýly zań qabyldandy. Osy jetistikterdi atap óte otyryp, bilim salasyndaǵy kez kelgen nátıje balalardyń bilim sapasy arqyly ata-analardyń, jumys berýshilerdiń bilim deńgeıine qanaǵattanýy arqyly baǵalanýy qajet ekendigin atap ótkim keledi»,- dedi Eraly Toǵjanov.