Eraly Toǵjanov bastaǵan qazaqstandyq delegatsııa jumys saparymen Tashkentke keldi
TAShKENT. QazAqparat – Búgin QR Premer-mınıstriniń orynbasary Eraly Toǵjanov bastaǵan qazaqstandyq delegatsııa jumys saparymen Tashkentke keldi, dep habarlaıdy QazAqparattyń menshikti tilshisi.
Eraly Toǵjanov Ózbekstan Respýblıkasy Premer-mınıstriniń orynbasary Behzod Mýsaevpen Ózbekstan Úkimetiniń ǵımaratynda kelissóz júrgizdi. Kezdesý barysynda koronavırýs ınfektsııasy taralýynyń aldyn alý sharalaryn jalǵastyrý jáne epıdemıologııalyq jaǵdaıdy jaqsartý, sonymen qatar densaýlyq saqtaý, ǵylym jáne bilim salasyndaǵy damýǵa basymdyq bere otyryp, qazaq-ózbek qatynastary damýynyń bolashaqtaǵy máseleleri talqylandy.
«Pandemııa bastalǵan sátten bastap barlyq memleketter jyldam sheshimin tabý kerek problemalyq jaǵdaıǵa tap boldy. Bizdiń elde osy máselelerdi jedel sheshýge baǵyttalǵan Premer-mınıstrdiń basshylyǵymen arnaıy memlekettik komıssııa quryldy. Birinshi kezekte, árıne dári-dármekpen qamtamasyz etý turdy. Búgingi kúni biz 900-den astam dári-dármekti elimizde shyǵaramyz. 25 kúnniń ishinde biz Nur-Sultan jáne Almaty qalalarynda eki ınfektsııalyq aýrýhana turǵyzdyq. Qazir zamanaýı talaptarǵa saı keletin ınfektsııalyq statsıonarlar elimizdiń barlyq óńirinde bar», - dedi E. Toǵjanov.
Ol koronavırýs pandemııasy medıtsınalyq kómek kórsetýdiń sharttary men jalpy densaýlyq saqtaý júıesiniń formatyn ózgertýge májbúr etkenin aıtty.
«Densaýlyq saqtaý júıesinde túbegeıli ózgerister boldy, keń mobıldi jáne qoljetimdilikti eskere otyryp, alǵashqy medıtsınalyq kómek kórsetýdiń uıymdastyrý tásilderi qaıta qaraldy. Tsıfrlandyrý arqyly bıznes ortany qalyptastyrý maqsatynda Ashyq jobasy engizilip jatyr. Qaraǵandyda reseılik «Spýtnık V» vaktsınasynyń shyǵarylýy jolǵa qoıyldy, 10 myń doza vaktsına óndirildi», - dedi qazaqstandyq delegatsııanyń basshysy.
Óz kezeginde Ózbekstan Premer-mınıstriniń orynbasary eldegi epıdemıologııalyq ahýal týraly jáne soǵan baılanysty qoldanylyp jatqan sharalar jóninde sóz etti. Sonymen qatar Ózbekstannyń farmatsevtıkalyq saladaǵy jetistikterine toqtalyp ótti.
«Epıdemıologııalyq jaǵdaıdy negizge alyna otyryp, eldegi jedel járdem qyzmeti eki esege artty, barlyǵy 4 myń oryndyq birneshe statsıonarlar salyndy. Eń bastysy – barlyq óńirde azamattardy qabyldap, jedel túrde alǵashqy kómek kórsetetin, keıin tıisti emdeý sharalaryn belgileıtin úlestirý ortalyqtarynyń qyzmetteri iske qosyldy. Qazirgi kezde Ózbekstannyń farmatsevtıkalyq saladaǵy jetistikterin eskere otyryp, Qazaqstannyń osy saladaǵy tájirıbesine qyzyǵýshylyq tanytýdamyz», - dedi B. Mýsaev.
Kelissóz barysynda qazaqstandyq delegatsııa quramynda QR Densaýlyq saqtaý mınıstri Aleksandr Tsoı, Bilim jáne ǵylym vıtse-mınıstri Rústem Bıǵary jáne QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraıymy Aıjan Esmaǵambetova boldy.
Avtor Mádıbek Jánibekov
