Eraly Toǵjanov balabaqshalardyń jumys sapasy kórsetkishin shuǵyl engizýdi tapsyrdy
NUR-SULTAN. QazAqparat - Elimizde tárbıeshilerdiń 25 paıyzdan astamynda balabaqshada jumys isteýge qajetti bilim joq. bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
«Bilim berý salasynda kúrdeli mindetter tur. Búginde bilim berý júıesinde kóp problemalar jınaqtalyp qaldy. Onyń ishinde balalardyń qaýipsizdigi, olardyń tárbıelik jáne bilimdilik deńgeıi, pedagogtardyń kásibıligi, ınnovatsııalar sany bar. Álemdik reıtıngterdiń málimetterine sáıkes, Qazaqstan bala tárbıesi boıynsha sońǵy 73-orynǵa turaqtady. PISA nátıjesi oqýshylardyń saýattylyǵy tómendigin kórsetti. Sondyqtan baıypty saraptama qajet. Bilimniń barlyq sanatyndaǵy jaǵdaıdy jaqsartý boıynsha búkil sharalardy qabyldaý kerek», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblıkalyq tamyz keńesi barysynda.
Sonymen qatar ol elimizde balabaqshalar sanynyń arta túskendigin, sońǵy 3 jylda ǵana 891 balabaqsha ashylǵandyǵyn aıta kele, sapa máselesine erekshe toqtaldy.
«Búginde olar qoǵamnyń da, ata-analardyń da kóńilinen shyqpaıdy. Bul problemany jan basyna qarjylandyrý da sheshe almaıdy. Barlyǵy úshin birdeı memlekettik tapsyrys jekemenshik jáne memlekettik balabaqshalarda ártúrli ornalastyrylady. Bul jumys sapasyna belgili bir deńgeıde kúdik týdyrady. Balalardyń kezegi saqtalyp, kezekke qoıý baıaý avtomattandyrylýda. Balalardyń 40 paıyzy ǵana elektrondy joldama alǵan», - dedi ol.
Premer-Mınıstr orynbasarynyń dereginshe, elimizde tárbıeshilerdiń 25 paıyzdan astamynda balabaqshada jumys isteýge qajetti bilimi joq.
«Álemdik tájirıbede qabyldanǵan balabaqshalardyń jumys sapasy kórsetkishin shuǵyl engizýdi tapsyramyn. Bul kórsetkishte ata-analardyń qanaǵattanýshylyq deńgeıin, qoǵam baǵasyn, balalardyń damýy deńgeıin, tamaqtaný sapasyn qosý qajet», - dedi Eraly Toǵjanov.
