Eraly Toǵjanov: «Aýyl amanaty» turǵyndardyń ál-aýqatyn arttyrýǵa jáne aýyldyń keshendi damýyna yqpal etedi
«Memleket basshysy ulyqtaý rásiminde aýyl mártebesin kóterýdiń mańyzdylyǵyn atap ótip, óziniń alǵashqy Jarlyǵynda aýyldardy damytý tujyrymdamasyn ázirleýdi tapsyrdy. Byltyr Aqtóbe oblysynda «Aýyl amanaty» jobasyn iske asyrý bastalyp ketkenin bilesizder. Negizgi maqsat – aýyldy barynsha saqtap qalý, ekinshiden, aýyl halqynyń ál-aýqatyn arttyrý, úshinshiden, jumyssyzdyqty azaıtý. Óńirde «Aýyl amanaty» baǵdarlamasyn iske qosýdyń alǵashqy kezeńi 134 aýyldyq okrýgke skrınıng júrgizýden bastaldy, onyń negizinde árbir okrýgtiń áleýmettik-ekonomıkalyq damý jospary ázirlendi. Osylaısha, oblysta áleýmettik-ekonomıkalyq damýdyń úsh deńgeıli tolyqqandy júıesi – oblys, aýdan, aýyl quryldy. Nátıjesinde biz ár aýyldyń, aýdannyń erekshelikterine oraı ekonomıkalyq áleýetin anyqtadyq, naqty múmkindikterdi, kúshti jáne álsiz jaqtaryn belgiledik. Oblys boıynsha 700 myń gektar paıdalanylmaıtyn jer anyqtaldy. Bul jerlerdiń barlyǵy jyl sońyna deıin qaıtarylady», - dedi Eraly Toǵjanov.
Ár aýyldyń áleýmettik portreti – naqty jumyssyzdardyń, ataýly áleýmettik kómek alýshylardyń, ózin-ózi jumyspen qamtyǵandardyń tizimderin jáne ár otbasynyń ortasha tabysyn qamtıdy. Sonymen qatar, tamaq ónimderin óndirý men tutynýdyń tepe-teńdigi anyqtaldy.
Skrınıngke sáıkes, Aqtóbe oblysy halyq tutynatyn negizgi azyq-túliktiń 65 túriniń 7-in tolyq qamtamasyz etedi. Іshki óndiris esebinen azyq-túliktiń 45 túrimen qamtamasyz etý úlesi 1%-dan 69%-ǵa deıin. Oblysta 13 ónim túri múldem óndirilmeıdi.
«Mysaly, óńir óz óndirisindegi qus etimen nebári 5,4% qamtamasyz etilgen. Bul shamamen 95% taýar shetelden nemese basqa aımaqtardan ákelinedi degendi bildiredi. Tek qus etiniń ózinen jylyna óńirimizde qaldyrýǵa bolatyn 11 mlrd. teńge syrtqa jumsalýda. Kókónisterge keletin bolsaq, ishki óndiris esebinen qamtamasyz etý 40%-ǵa jetpeıdi. Jyl saıyn kókónis satyp alýǵa shamamen 10 mıllıard teńge jumsalady. Osy derekterdiń negizinde Aqtóbe oblysy negizgi azyq-túliktiń 65 túrin óndirýdi jolǵa qoıyp, jyl saıyn óńir ekonomıkasynda 151 mlrd teńge qaldyra alady», - dep atap ótti oblys ákimi.
Atalǵan máseleni sheshý maqsatynda «Aýyl amanaty» jobasy aıasynda tamaq ónimderiniń árbir túri boıynsha óndiristi damytý baǵyttary aıqyndaldy, jeke qosalqy sharýashylyqtar iske asyratyn jobalar daıyndaldy.
«Memleket basshysynyń aýyldardy damytýǵa 1 trln teńge bólý týraly sheshimi ımportqa táýeldilikti joıyp qana qoımaı, búginde azyq-túlik ımportyna jumsalatyn qarajatty el ishinde qaldyrýǵa múmkindik beredi», - dep túıindedi Eraly Toǵjanov.
