Eraly Toǵjanov Atyraýdaǵy koronavırýstyń ekinshi tolqynyna daıyndyqty tekserdi
ATYRAÝ. QazAqparat –Memleket basshysynyń tapsyrmasyna sáıkes óńirlerdiń epıdemıologııalyq jaǵdaıymen jáne koronavırýs ınfektsııasynyń ekinshi tolqynyna daıyndyǵymen tanysý maqsatynda QR Premer-Mınıstriniń orynbasary Eraly Toǵjanov jumys saparymen Atyraý oblysyna keldi, dep habarlaıdy QazAqparat.
Ol ótkizgen jedel keńeste Atyraý oblysynyń ákimi Mahambet Dosmuhambetov koronavırýs ınfektsııasynyń ekinshi tolqynyna daıyndyq týraly baıandady.
Eraly Toǵjanov óńir basshylyǵyna epıdemıologııalyq ahýaldy, halyqty jáne medıtsınalyq mekemelerdi dári-dármekpen, sondaı-aq ókpeni jasandy jeldetý apparattarymen, ottegi kontsentratorlarymen qamtamasyz etý máselesin erekshe baqylaýda ustaýdy tapsyrdy. Sondaı-aq, óńir basshylyǵyna karantın rejımin saqtaý qajettiligi týraly halyq arasynda túsindirý jumystaryn kúsheıtý tapsyryldy.
Premer-Mınıstrdiń orynbasary jumys saparynyń aıasynda 200 tósek-oryndyq modýldi juqpaly aýrýlar aýrýhanasy qurylysynyń barysymen tanysty. Oblysty dári-dármekpen qamtýdaǵy turaqtandyrý qoryna, aımaqtyń dárihana jelilerine 42 ataý boıynsha dárilik zattardy jetkizetin «Іńkár» JShS qoımasyna bardy. Budan soń Atyraý qalasyndaǵy №4 emhanada boldy. Kelýshilerdiń temperatýrasyn avtomatty túrde ólsheıtin robotty iske qosqan emhanada 343 medıtsına qyzmetkeri jumys isteıdi.
E.Toǵjanov óńirde «Jumyspen qamtýdyń 2020-2021 jyldarǵa arnalǵan jol kartasy»
baǵdarlamasy aıasynda júrgizilip jatqan alty jolaqty avtojoldyń qurylys jumystarynyń sapasymen, 600 oryndyq mektep qurylysynyń barysymen tanysty.
