Eraly Toǵjanov Atyraýda «Teńiz» kenishindegi máselege qatysty keńes ótkizdi
ATYRAÝ. QazAqparat - QR Premer-Mınıstriniń orynbasary Eraly Toǵjanov bastaǵan Úkimet delegatsııasy jumys saparymen Atyraý oblysyna bardy, dep habarlaıdy QazAqparat.
«Jumys sapary barysynda Eraly Toǵjanov óńirdegi epıdemıologııalyq ahýal, «Teńiz» kenishindegi jumysshylardy shyǵarý men Jumyspen qamtýdyń jol kartasyn iske asyrý máselelerine qatysty keńes ótkizdi.
QR Premer-Mınıstriniń orynbasary Eraly Toǵjanov elimizde koronavırýs ınfektsııasyn juqtyrý ósimi 2-3% deńgeıinde ekenin atap ótti. Kórsetkishtiń tómendeýi Memleket basshysy Qasym-Jomart Toqaevtyń tapsyrmasymen qabyldanǵan naqty sharalardyń nátıjesi», delingen Prezıdent janyndaǵy TJ rejimin qamtamasyz etý jónindegi memlekettik komıssııanyń Telegram paraqshasynda .
Atyraý oblysynyń ákimi Mahambet Dosmuhambetovtiń aıtýynsha, aımaqtaǵy epıdemıologııalyq jaǵdaı áli de turaqty emes. Qazirgi kezde óńirde COVID-19 ınfektsııasyn juqtyrǵan 458 adam tirkelgen. Olardyń 127-si emdelip shyqty. Al «Teńiz» kenishiniń 384 jumysshysynan atalǵan vırýs anyqtalǵan. Bul azamattar 20 jataqhanada turatyn 33 mekemeniń qyzmetkerleri.
QR Densaýlyq saqtaý mınıstri Eljan Birtanovtyń aıtýynsha, «Teńiz» kenishinde karantındik talaptar jetkilikti deńgeıde saqtalmaı otyr. Sondyqtan, ol «Teńizshevroıl» kompanııasynyń merdiger jáne sýbmerdiger kompanııalary basshylarynyń jaýapkershiligin arttyrýǵa shaqyrdy.
Qazirgi kezde «Teńiz» kenishinen 17 myń adam ózderiniń turǵylyqty jerine jetkizilgen.
Sondaı-aq, keńes barysynda «Jumyspen qamtýdyń jol kartasy-2020» baǵdarlamasyn óńirde júzege asyrý barysy qaraldy. Úkimet bıyl 1 mln 220 myń adamdy jumyspen qamtýdy josparlap otyr. Atyraý oblysynda bul baǵdarlama sheńberinde 63 joba júzege asyrylyp, 7 myń jumys orny ashylady. Oǵan respýblıkalyq bıýdjetten 35 mlrd 308 mln teńge bólinip otyr.
Otyrysty qorytyndylaǵan QR Premer-Mınıstriniń orynbasary Eraly Toǵjanov epıdemıologııalyq ahýaldy baqylaýda ustaýdy tapsyryp, «Jumyspen qamtýdyń jol kartasy-2020» baǵdarlamasyn tıimdi júzege asyrý jáne jumyspen qamtamasyz etýge qatysty birqatar naqty tapsyrmalar berdi.
