Eraly Toǵjanov «Amanat» táýelsiz komıssııasynyń ókilderimen kezdesti

NUR-SULTAN. QazAqparat - Búgin Premer-Mınıstrdiń orynbasary Eraly Toǵjanov qańtar oqıǵalary kezindegi faktilerdi tergeýmen aınalysatyn «Amanat» táýelsiz komıssııasynyń ókilderimen kezdesti, dep habarlaıdy primeminister.kz saıty.

Kezdesý kezinde quqyq qorǵaýshylar komıssııa qyzmetiniń baǵyttary týraly áńgime qozǵady.

«Amanat» komıssııasynyń ókilderi qańtarda bolǵan oqıǵalardy tergeýdiń obektıvtiligi men ashyqtyǵyn qamtamasyz etýdiń mańyzdylyǵyn atap ótip, memlekettik organdardyń jumysyn uıymdastyrý boıynsha birqatar usynys bildirdi.

Vıtse-premer memlekettik organdarǵa qoǵamdyq komıssııanyń árbir usynysyn muqııat pysyqtap, máselelerdi zańnamada belgilengen tártippen sheshýdi, sondaı-aq komıssııa qyzmetine qajetti kómekti kórsetýdi tapsyrdy.
Aıta keteıik, «Amanat» qoǵamdyq komıssııasy 2022 jyly qańtarda bolǵan oqıǵalarǵa baılanysty negizsiz qýdalanǵan azamattardyń quqyqtary men bostandyqtaryn qorǵaý úshin quryldy.

Negizgi maqsaty: beıbit narazylyqtarǵa qatysqany úshin tergeýde bolǵan, biraq qylmystyq nıeti bolmaǵan, sondaı-aq qylmystarǵa qatysy joq adamdardy qylmystyq qýdalaýdan bosatý.

Komıssııa quramy segiz adamnan turady, onyń ishinde tórt kásibı zańger, bir Májilis depýtaty, Ulttyq qoǵamdyq senim keńesiniń bir múshesi bar jáne Bas prokýratýra men Іshki ister mınıstrliginen bir ókilden qosyldy.