Eraly Toǵjanov Aqtóbedegi ındýstrııalyq aımaqtyń jumysyn synǵa aldy
Aqtóbe oblysynyń ákimi Eraly Toǵjanov «Aqtóbe» ındýstrııalyq aımaǵynda jumys istep turǵan óndiris oryndaryn aralady. 2015 jyly ashylǵan ındýstrııalyq aımaqta hımııa ónerkásibi, qurylys materıaldaryn óndirý, shınalardy óńdeý jáne qalpyna keltirý t.b. salalarmen aınalysatyn 12 kásiporyn iske qosylǵan. Investıtsııalardyń jalpy kólemi 28 mlrd teńgeden asyp, 655 jumys orny quryldy. Sońǵy tórt jylda óndirilgen ónim kólemi 4 mıllıard teńgeni qurady. Іske qosylǵan jobalardyń qatarynda «Talan Teknolodjı» JShS-niń qaýipsiz tósemeler, «Aqtóbe Topsa Plast» JShS-niń antıfrız jáne hımııalyq reagentteri jáne «Polıvest» JShS-niń polıetılen ónimderiniń óndirisi bar. Eksporttalǵan ónim 133 mln.teńgeni qurap, salyq kólemi 1,7 mlrd.teńgege shyqty. Qazirgi ýaqytta metallýrgııa jáne munaı-hımııa ónerkásibi, qurylys materıaldaryn óndirý, iri qara mal terisin óńdeý sııaqty ekonomıkanyń basym salalarynda 12 jobany júzege asyrý men iske qosý jumystary júrgizildi. 16 mıllıard teńge kóleminde ınvestıtsııa tartylyp, 707 jumys orny qamtyldy.
«44 mıllıard teńge ınvestıtsııa asa kóp emes. Osyǵan baılanysty ındýstrııalyq aımaqtyń tıimdiligine qatysty óte úlken suraq týyndaıdy. Biz ınvestorlardy qoldaýǵa jáne olardyń jobalaryn júzege asyrýǵa kómektesýge daıynbyz. Olar úshin qajetti jaǵdaı men ınfraqurylym jasaý – bizdiń másele, biraq ınvestıtsııa men iri ınvestorlardy tartý – sizdiń tikeleı mindetińiz. Jan-jaqty saraptap, jumys isteýdiń jańa tásilderin izdestirý qajet», – dedi oblys ákimi ındýstrııalyq aımaqty basqarýshy kompanııa basshylyǵyna.
Aımaq basshysy ınvestıtsııalyq saıasatty, iri kompanııalardy tartý josparyn ázirleýdi, sondaı-aq basqa óńirlerdegi ındýstrııalyq, erkin ekonomıkalyq aımaqtardyń qyzmetine salystyrmaly taldaý jasaýdy, ındýstrııalyq aımaqtyń jumysyn kúsheıtý boıynsha qysqa merzimde usynystar daıyndaýdy tapsyrdy. Eraly Toǵjanov basqarýshy kompanııanyń jumys nátıjesin tómen dep baǵalady.
«Aqtóbe oblysynyń áleýeti zor, biraq ol tolyq paıdalanylmaı otyr», - dep túıindedi oblys basshysy.
Keıin Eraly Toǵjanov kásiporyndardyń qyzmetimen, sonyń ishinde keramogranıtten, qysh taqtaıshasy men polıpropılendi vagon qaptamalaryn, bıologııalyq ydyraıtyn bıg-beg paketter, antıfrız jáne áınek jýýǵa arnalǵan suıyqtyq shyǵaratyn zaýyttar men hımııalyq reagent óndiretin zaýyt qurylysynyń barysymen tanysty.
