Eraly Toǵjanov Aqtóbede jol jóndeý, qurylys jumystarynyń barysyn tekserdi

ASTANA. QazAqparat – Bıyl Aqtóbe oblysynyń tarıhynda rekordtyq 848 shaqyrym jergilikti mańyzy bar avtomobıl joldaryn jóndeý jáne salý josparlanyp otyr, dep habarlaıdy QazAqparat.

Jyl qorytyndysy boıynsha qabyldanǵan sharalar nátıjesinde normatıvtik jaǵdaıdaǵy jergilikti mańyzy bar joldardyń úlesi qazirgi 72%-dan 78%-ǵa deıin ulǵaıtylady dep kútilýde.

Jumystyń basym bóligi qurylys materıaldaryn daıyndaýǵa jaýapkershilikpen qaraýdy talap etedi.

Búgin oblys ákimi syıymdylyǵy 3700 tonna bolatyn «GOAR» JShS bıtým qoımasynyń jumys barysymen tanysyp, qoımalardyń bıtýmmen toltyrylǵanyna kóz jetkizdi.

«Bizdiń aldymyzda turǵan basty mindet – bıtým máselesin sheshý. Ótken jyly bıtýmnyń jetispeýshiliginen jumys qarqyny baıaýlaǵan bolatyn, bul jaǵdaıdyń qaıtalanýyna jol bermeýge tıispiz», - dep atap ótti Eraly Toǵjanov.

Óńir basshysy ýákiletti organdarǵa jol-qurylys kompanııalaryn qıyrshyq tas, qum-qıyrshyq tas qospasy men bıtýmnyń qajetti kólemimen úzdiksiz qamtamasyz etý máselesin qatań baqylaýda ustaýdy tapsyrdy.

Qazirgi ýaqytta oblystyń bıtým qoımalarynda 16 myń tonnadan astam bıtým jınaqtalǵan. Atalǵan qurylys materıalyn satyp alý jáne ákelý jumystary jalǵasýda. Aldyn-ala jasalǵan kelisimder boıynsha mamyr-maýsym aılarynda 10 myń tonnadan astam bıtým jetkiziledi.

Oblys ákimi «Kazkomservıs» JShS óndiristik bazasynyń asfaltbeton zaýytynyń jumys barysymen tanysyp, tolyqtaı avtomattandyrylǵan óndiris protsesin aralap kórdi.

Oblys ákiminiń bıtým qoımalarynyń qýatyn arttyrý jónindegi tapsyrmasyn oryndaý boıynsha kásiporyn tıisti sharalar qabyldaǵan. Qazirgi ýaqytta 2500 tonnaǵa arnalǵan bıtým qoımasynyń qurylysy júrgizilýde. Sondaı-aq óndiris aýmaǵynda «Qazkomservıs» kompanııasy júzege asyratyn jol jobalary úshin temirbeton buıymdaryn óndirý tsehy jumys isteıdi.

Sonymen qatar, jumys babymen qalany aralaý barysynda óńir basshysy «Aqtóbe qalasynyń ońtústik aınalma joly» avtojolynyń 21,5-ten 35,3 shaqyrymǵa deıingi ýchaskesiniń qaıta jańartý jumystaryn tekserdi.

Esterińizge sala keteıik, oblys ákimi osy ýchaskedegi jumystardy osyǵan deıin jeke baqylaýyna alǵan bolatyn. Nátıjesinde, ótken jyldyń kúzinde qysqa merzimde eki jolaqty jol tóselip, kólik qozǵalysyn ashýǵa múmkindik berdi.

Bıylǵy sáýirdiń sońynda 2,9 shaqyrym joldyń negizgi astyńǵy qabaty daıyndalyp, mamyr aıynda asfaltbeton qospasyn tóseý bastaldy. Jumys belsendi qarqynmen júrgizilip, qysqa merzimde aıaqtalady dep kútilýde.