Eraly Toǵjanov aqparat salasyndaǵy mamandarǵa alǵys aıtty

NUR-SULTAN. QazAqparat – 2020 jyly koronavırýstyń taralýy kezeńinde Aqparat mınıstrliginiń jumysy erekshe boldy. Bul týraly QR Premer-Mınıstriniń orynbasary Eraly Toǵjanov málim etti, dep habarlaıdy QazAqparat tilshisi.

«Ásirese, «halyq únine qulaq asatyn memleket» tujyrymdamasyn júzege asyrý eń aldymen mınıstrliktiń tikeleı qyzmetine baılanysty. Der kezinde halyqqa jetkize bilý, halyqqa túsindire bilý mańyzdy. Osy oraıda qıyn jaǵdaıda eshteńe jasyrylǵan joq, barlyǵy elge jarııalandy», - dedi E. Toǵjanov QR Aqparat jáne qoǵamdyq damý mınıstrliginiń keńeıtilgen alqa májilisinde.

Bul turǵyda ol atalǵan mınıstrlik tarapynan aýqymdy jumystar atqarylǵanyn jetkizdi.

«Aqparat salasynda jumys isteıtin barlyq azamattarǵa alǵys aıtýǵa ruqsat etińizder. Qıyn jaǵdaıda birde-bir azamat keıin tartpady. Osy kezeńde eshqaısysy basyn buǵyp qalmady, tikeleı atsalysty», - dedi Úkimet basshysynyń orynbasary.

«Volonterlik baǵytta kóptegen is-sharalar atqaryldy. Osy oraıda Prezıdenttiń tikeleı tapsyrmasymen tıisti jumystar júzege asyryldy. Bul jumysty ary qaraı jalǵastyrýǵa qatysty tapsyrmalar berildi, sondyqtan osyny iske asyratyn bolamyz», - dedi Eraly Toǵjanov.

Budan buryn habarlanǵandaı, mınıstrliktiń alqa májilisinde aldaǵy ýaqytta qaıyrymdylyq jáne volonterlik jónindegi zań jobalaryn jetildirý josparda bar ekendigi aıtyldy.