Eraly Toǵjanov: Ákimdikter apatty mektepterdi joıý boıynsha naqty sheshim qabyldaýy tıis
NUR-SULTAN. QazAqparat - 1 qyrkúıekke deıin elimizdegi barlyq mektep pen balabaqsha beınebaqylaý kameralarymen qamtamasyz etilýi tıis. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
«Mektep júıesinde áli kúnge deıin 237 problemaly mektep bar. Sonaý 2017 jyly-aq bilim berý memlekettik baǵdarlamasy aıasynda olardyń barlyǵy joıylýy tıis edi. Jańa memlekettik baǵdarlamada 800 jańa mekteptiń qurylysy josparlanǵan. Apatty jaǵdaıda balalar bilim alyp jatqan kezde mektep sapasyna, standartyna qatysty másele týyndaıdy. Mundaı mektepterdiń basym bóligi Batys Qazaqstan oblysynda 12, al Túrkistan oblysynda 7 jáne Atyraý men Jambyl oblystarynda 5-ten qalyp otyr. Barlyq ákimdikterge shuǵyl arada apattyq, úsh aýysymdy mektepterdi joıý boıynsha naqty sheshim qabyldaýdy, qabyldanǵan sharalar týraly baıandaýdy tapsyramyn. Bul másele meniń jeke baqylaýymda bolady. Keshe ǵana barlyq óńirlerge tapsyrma berdim. Mektepterde jóndeý jumystary júrgizilip jatqan óńirler de bar», - dedi Eraly Toǵjanov pedagogtar men bilim jáne ǵylym salasy qyzmetkerleriniń respýblıkalyq tamyz keńesi barysynda.
Sonymen qatar ol bilim mazmuny men sapasyna qatysty da óte ózekti másele qalyp otyrǵandyǵyn aıtty. Máselen, 2018 jyly PISA nátıjesi barlyq kórsetkishter boıynsha Qazaqstannyń TMD elderinen qalyp qoıǵandyǵyn kórsetken. Sonymen qatar Premer-Mınıstrdiń orynbasary aýyl men qala mektepteri arasyndaǵy bilim alshaqtyǵyn joıý qajettigine basa nazar aýdartty.
«Taǵy bir mańyzdy másele - mektepte balalardyń qaýipsiz bolýy. 2 200 mektepte dárethana dalada ornalasqan. Mektepterdi jyly sanıtarlyq jelimen qamtamasyz etý máselesin shuǵyl sheshý qajet. Buǵan qosa, 1 qyrkúıekke deıin mektepter men balabaqshalar beınebaqylaý kameralarymen qamtamasyz etilýi tıis. Oblys ortalyqtary men qalalalardaǵy mektepter mamandandyrylǵan kúzetke kóshýi qajet», - dedi Eraly Toǵjanov.
