Eralıevter áýleti otandyq kúrish óndirisiniń damýyna súbeli úles qosyp júr

Abzal Eralıev – «Abzal jáne kompanııa» seriktestiginiń negizin qalaýshy, Qazaqstannyń Eńbek Eri, Qyzylorda oblysynyń qurmetti azamaty, Qazaqstan Respýblıkasy Parlamenti Májilisiniń depýtaty. Ol tek kúrish óndirip qana qoımaı, óziniń týǵan jeri – Naǵı Іlııasov aýylynyń damýyna eleýli úles qosyp kele jatqan qamqor jan. Mektep ǵımaratyn kúrdeli jóndeýden ótkizý, sport kesheni, meshit, monsha, balabaqsha salý, mádenıet úıiniń qurylysyn aıaqtaý – Abzal Eralıevtiń aımaq damýyna qosqan úlesi.

- Siz áke isin jalǵastyrýdasyz. Bul úlken jaýapkershilikti talap etetin jumys. Osy isti qalaı jalǵastyrýdasyz? Bul tek jumys emes, ákeńizdiń amanaty, bastaǵan isi emes pe...

- Ákem jumys barysymen Nur-Sultan qalasyna aýysyp ketkendikten, onyń isin jalǵastyryp, «Abzal jáne K» kompanııasynyń dırektory qyzmetin atqaryp kelemin. Buǵan deıin osy kompanııada logıst bolyp eńbek ettim. Kúrishti vagondap tıisti jerge jiberip, ıaǵnı taýar jetkizýshi boldym.

Odan keıin qurylys zattaryn tasýmen aınalysyp, zaýyttyń menedjeri boldym. Keıin kompanııa basshysynyń orynbasary bolsam, qazirgi ýaqytta dırektory qyzmetine aýystym. Bul – úlken kásip, úlken jumys. Ákemniń otbasylyq kásibi retinde tapsyrǵan amanaty. Ony alyp júrip qana qoımaı, damyta túsýimiz kerek.

- Osy kompanııaǵa ózińiz dırektor bolǵaly qandaı jańashyldyq engizip, qandaı nátıjege qol jetkizdińiz?

- Qazirgi tańda kadrymyzdyń myqtylyǵynyń, jaqsy mamandardyń jumys isteýiniń arqasynda bul kásipti jańa satyǵa kóterdik. Bul jerde eki jaǵdaıǵa mán berip qaraýǵa bolady: birinshi – kórsetkishter, ıaǵnı bizdiń jınaıtyn kúrishimizdiń eń joǵary kólemi 53 myń tonna bolsa, kompanııaǵa jas býyn kelgeli 70 tonnaǵa deıin jetti.

A ıtyp ótýge bolatyn ekinshi jaǵdaı, 2019 jyldyń qyrkúıek aıynda kúrish zaýytyn iske qosqan bolatynbyz. Ol Qazaqstandaǵy alǵashqy tsıfrlyq kúrish zaýyty bolyp sanalady. Kabınette 4 monıtor bolady, ol batyrma arqyly basqarylady.

Zaýytta bolyp jatqan jumysqa sol monıtorlar arqyly baqylaý júrgizilip otyrady, ıaǵnı qansha tonna qara kúrish, qansha tonna aq kúrish shaqqanyn, qaı jerde qandaı aqaý bolyp jatqanyn kórip otyrýǵa bolady.

- Jumys barysynda qandaı erejeni basshylyqqa alasyz?

- Eń bastysy – qyzmetkerlerdiń tártipke baǵynýy, ıaǵnı jumysqa ýaqytyly kelip, ýaqytyly qaıtýy mańyzdy. Ekinshiden, myqty mamandarǵa ınvestıtsııa jasaýymyz kerek, ıaǵnı olardyń jaǵdaıyn jasap, jalaqylaryn ýaqytyly tólep, shetelde biliktilikterin arttyryp kelýge múmkindik bersek – olar jumys berýshiniń úmitin aqtaıdy.

Olar ónimniń sapasyn arttyrý baǵytynda bar kúshin salady. Odan keıin jumysyn adal atqaratyndarǵa motıvatsııa berip, syıaqy aýdaryp otyramyz. Jazda ondaı qyzmetkerlerdiń balalaryn lagerge jiberip turamyz.

- Ákeńizdiń boıynda baǵalaıtyn erekshe qasıet.

- Ákemniń boıyndaǵy adaldyq qasıetin, nıetiniń túzýligin joǵary baǵalaımyn. Ol meıirimdi adam. Ol óz kásibin dóńgeletýdi ǵana oılamaı, muqtaj jandarǵa qol ushyn sozyp, múmkindigi jetkenshe kómektesip turady. Ákem óte eńbekqor adam, demalys kúnderi de ol erte turyp, kúrish alqabyna baryp, jumysshylardy qadaǵalaıtyn.

Ol maǵan jas kezińde tynym tappaı eńbek etseń, keıin sony jemisin jeıtinińdi aıtyp otyrady. Sondaı-aq, ákem qonaqjaı adam. Ol úıge kelgen qonaqty bar kóńilimen qarsy alyp, mol dastarhamen qarsy alady. Men de onyń ustanymdaryn óz ómirimde qoldanamyn.

- Joǵaryda aıtyp ótkenińizdeı, sizder qaıyrymdylyq sharalarymen aınalysatyndaryńyzdy bilemiz. Pandemııa kezinde de, oǵan deıin de qaıyrymdylyq sharalaryna basa nazar aýdardyńyzdar. Nelikten osyndaı ıgi istermen aınalysýǵa bel býdyńyz?

- Qaıyrymdylyq sharalarymen aınalysýdy jalǵastyra beremin. Bul – ákemizdiń tárbıesi, bul qasıet onyń boıynan bizdiń boıymyzǵa daryǵan. Halyqtyń jaǵdaıynyń jaqsy bolýy aýyldyń jaǵdaıynyń jaqsy bolýynan bastalady.

Ákem týǵan-týys, dos-jaran, tanystaryna da qol ushyn sozyp keledi. Úlken kásippen aınalysatyndyqtan, bizde muqtajdarǵa kómektesý múmkindigimiz de kóp. Kómek suraǵan adamnyń suranysyn 100% qanaǵattandyrý múmkin emes, biraq qoldan kelgenshe qarjylaı da, basqa jaǵynan da kómektesemiz.

- Ómirlik ustanymyńyz qandaı?

- Ómirlik ustanymym – qolǵa alǵan iske adal bolý. Qandaı kásip túrimen aınalyssaq ta berekeli kásip túrimen aınalysamyz, ıaǵnı ishimdikke, túngi klýb sııaqty adam taǵdyryna jaman áser etetin salaǵa bet burmaımyz.

- Praımerızge qatysyp jatyrsyz. Qandaı jobalardy júzege asyrmaqshysyz? Qatysýdaǵy maqsatyńyz qandaı?

- Praımerızge qatysýdaǵy maqsatym – elime, jerime, Syr óńirine kishigirim bolsa da kómegimdi tıgizý. Oblys kóleminde týyndaǵan halyqtyń suraqtaryn, usynystaryn bılik basyndaǵy atqarýshy organdarǵa durys jetkizip, durys sheshimin tabýǵa úles qosý. Men jastar arasyndaǵy turǵyn-úı máselesin sheshkim keledi.

Bastapqy jarna mólsherin tómendetip, jumys isteıtin jastarǵa jaldamaly páter berý máselesin kótergim keledi. Mundaı baǵdarlama elimiz boıynsha, Nur-Sultan, Almaty, Shymkent qalalarynda bar, endi osy baǵdarlamany Qyzylorda oblysynyń jastary úshin de qoljetimdi etkizgim keledi.

Úı alǵanda bastapqy jarna retinde 1,5-2 mıllıon teńge jınaý ońaı emes, sol sebepti bastapqy jarnany 20%-dan 3-5%-ǵa deıin túsirý baǵytynda jumys istegim keledi. Praımerızge qatysty «Jeńiske 5 qadam» degen jeke baǵdarlamam bar.

Birinshi qadam densaýlyq salasyna, ekinshi qadam rýhanııatqa, úshinshi qadam bilimge, tórtinshi qadam turǵyn úıge, besinshi qadam kásipkerlikk baılanysty.

QR jastar saıasaty týraly zańnamasyna «Jas kásipker» degen mártebe engizip, osy mártebe arqyly memlekettik baǵdarlamalardyń jeńildikterin alý baǵytynda jumys isteı alamyz.

- Suhbatyńyz úshin rahmet!