ERA-GLONASS ornatylǵannan keıin Qazaqstanda kólik baǵasy qanshalyqty qymbattaıdy
ASTANA. QazAqparat - Jańa avtomobılge spýtnıktik monıtorıngileý júıesin ornatý onyń qunyna aıtarlyqtaı áser etpeıdi.
Bul jaıynda QazAqparat Qazaqstandyq avtobıznes qaýymdastyǵyna silteme jasap habarlaıdy.
«2015 jyldyń qańtarynda kúshine engen TS 018/2011 tehnıkalyq reglamenti 2017 jyldan bastap barlyq kólik quraldaryna spýtnıktik monıtorıngileý júıesin ornatýdy mindetteıdi. Jańa avtomobılge spýtnıktik monıtorıngileý júıesin ornatýmen mashına jasaýshylar, onyń ishinde Qazaqstanda da ózderi aınalysatyn bolady. Onyń avtomobıl qunyna aıtarlyqtaı yqpaly bola qoımaıdy. Qymbattaý shamamen 100 myń teńgeni quraıdy», - delingen aqparatta.
Aıta keterligi, Qazaqstandyq avtobıznes qaýymdastyǵynyń prezıdenti Andreı Lavrentev adam ómiriniń árbir mınýty qymbat sátte shuǵyl áreket etýdiń biryńǵaı júıesi qajet dep sanaıdy.
«Árbir mınýt esepteýli sátte bireýlerdi qurylǵy quny alańdata qoıady dep oılamaımyn. Ýaqyt óte kele jol-kólik apaty boıynsha statıstıka jaqsy jaǵyna qaraı ózgeredi. Joldarda jolaýshylardyń ómirin saqtaýǵa barlyǵy da múddeli», - deıdi ol.
ERA-GLONASS - bul jol-kólik apaty oryn alǵanda jedel aqparat beretin avtomattandyrylǵan júıe. Apat kezinde qaýipsizdik jastyqshasy astyna ornatylǵan arnaıy qurylǵy iske qosylyp, shuǵyl qyzmetterdi shaqyrady. Bul rette ol avtomobıldiń turǵan jerin, qozǵalys jyldamdyǵy men baǵytyn da birden habarlaıdy.
Jeltoqsan aıynyń sońynda jańa júıeniń is júzindegi jumysy Astanadaǵy Ulttyq ǵarysh ortalyǵynda tanystyryldy. Ony baǵalaýǵa Qazaqstan Respýblıkasy Investıtsııalar jáne damý mınıstriniń birinshi orynbasary Albert Raý, «QazInst» RMK bas dırektory Haırat Káribjanov, sondaı-aq QR Qorǵanys jáne aeroǵarysh ónerkásibi mınıstrliginiń, QR ІІM TJ komıtetiniń, respýblıkalyq Sanıtarlyq avıatsııa jáne basqa da vedomstvo ókilderi keldi.
Kórsetilim úshin úsh avtokólik paıdalanyldy: biri Astana qalasynda, ekinshisi Almaty qalasynda jáne úshinshisi Astana-Almaty tas jolynda ornalasty. Olardyń barlyǵyna Qazaqstanda jáne Reseıde jasap shyǵarylǵan shuǵyl qyzmetterdi shaqyrý qurylǵylary ornatyldy.
