Er Jánibek Berdáýletulynyń 300 jyldyǵyna oraı jaryq kórgen basylymdardyń tusaýkeseri ótedi
ASTANA. QazAqparat - 11 mamyr kúni Almatyda Er Jánibek Berdáýletulynyń 300 jyldyǵyna oraı jaryq kórgen basylymdardyń tusaýkeser rásimi ótedi.
Shara saǵat 11.00-de qaladaǵy RIXOS-Almaty qonaq úıiniń konferentsııa zalynda ótpek. Atap aıtqanda, munda XVIII ǵasyrdaǵy qazaq halqynyń jońǵarlarǵa qarsy ult-azattyq qozǵalysynda qol bastaǵan qaharman batyrlarymyzdyń biri Er Jánibek Berdáýletuly týraly «Er Jánibek - 300 jyl» anyqtamalyq-bıblıografııalyq ǵylymı jınaǵynyń, Mońǵolııadaǵy qazaq jazýshysy Sultan Táýkeıulynyń «Aqyr Jánibek» romanynyń, sondaı-aq «Kereıde batyr Jánibek» aýdıobeıne jınaǵynyń tusaýy kesilmek. Konferentsııaǵa Dúnıejúzi qazaqtary qaýymdastyǵy tóraǵasynyń orynbasary Talǵat Mamashev, «Er Jánibek» halyqaralyq qorynyń prezıdenti Maqsut Temirbaev, «Er Jánibek» halyqaralyq qorynyń vıtse-prezıdenti Jeńis Túrkııa qatyspaq. Sondaı-aq onda QR Eńbek sińirgen qaıratkeri, aqyn-jyrshy Baıanǵalı Álimjan, tarıh ǵylymdarynyń kandıdaty Janymhan Oshan, fılologııa ǵylymdarynyń kandıdaty, QR mádenıet qaıratkeri Bazarbek Atyǵaı jáne basqa da qonaqtar bolady dep kútilýde.
