Er Jánibek batyrǵa arnalǵan músháıranyń jeńimpazdary anyqtaldy
Músháırada elimizdiń belgili aqyndary men jas talanttar baq synasty. Báıge qorjynyna kelip túsken týyndylardyń ishinde batyr bolmysyn jan-jaqty somdaǵan kólemdi poemalar da, tolymdy tolǵaýlar da, órnekti óleńder de boldy. Er Jánibektiń tarıhı tulǵasyn jyrlaı otyryp, búgingi kúnniń bıiginen sóz aıta bilgen, zaman tynysyn, qoǵam kelbetin tereńnen qozǵaǵan kórkem týyndylar basty nazarda ustaldy.
Bilikti ǵalymdar men tanymal aqyndardan quralǵan, QR Memlekettik syılyǵynyń laýreaty, aqyn Nesipbek Aıtuly tóraǵalyq etken qazylar alqasy saraptap saralaı kele tómendegideı uıǵarymǵa keldi. Bas júldeni (temir tulpar) «Erlik jyry» atty óleńimen qazaqtyń arqaly aqyny, Alash syılyǵynyń ıegeri Júrsin Erman jeńip aldy. Birinshi oryn almatylyq tanymal aqyn Baqytbek Bámishulynyń «Rýh jyry - Er Jánibek» poemasyna berildi. Ekinshi oryndardy «Er Jánibek» óleńimen óskemendik Azamat Tasqara jáne «Jánibek - Er Jánibek - Bı Jánibek» dastanymen jezqazǵandyq Kenjebaı Ahmetov enshiledi. Úshinshi oryndardy monǵolııalyq Suraǵan Rahmetuly «Jarqa Elbrýsi», «Kıe» atty óleńderi úshin, astanalyq Aqberen Elgezek «Er Jánibek, Er Jánibek!» tolǵaýy úshin, óskemendik Áskerhan Aqtaı «Qyrlaýly naıza qolǵa alǵan» tolǵaýy úshin ıelendi. Yntalandyrý syılyqtary shyǵysqazaqstandyq Aıjaryq Ábilhasymovtyń «El qorǵany - Er Jánibek» poemasyna, mańǵystaýlyq jas aqyn Edilbek Dúsenovtiń «Er Jánibek» tolǵaýyna, astanalyq Baýyrjan Qaraǵyzulynyń «Er Jánibek rýhyna» óleńine, atyraýlyq Álııa Dáýletbaevanyń «Jánibektiń aq týyn joqtaý» óleńine, almatylyq Maqsuthan Barkól-Dáleıdiń «Arýaǵyń aýnasyn» terme-tolǵaýyna buıyrdy. Sonymen birge Semeı qalasynyń ákimi Aıbek Kárimov, Shákárim atyndaǵy Semeı memlekettik ýnıversıteti jáne «Er Jánibek» qory taǵaıyndaǵan syılyqtardy Egeýhan Muhamádıqyzy (ShQO), Qaırat Kámeı (QHR), Erlan Júnis (Astana), Adalbek Aqmádıuly (Almaty), Tolybaı Abylaev (Qyzylorda) syndy aqyndar qanjyǵalaryna baılady, dep habarlaıdy kazaitys.kz.