«Er Tóstik pen Aıdahar» tolyqmetrajdy tuńǵysh otandyq mýltfılmi bir aptada 31,3 mln. teńge jınady

ALMATY. 27 naýryz. QazAqparat - 21 naýryzdan bastap Qazaqstan kınoteatrlarynan kórsetile bastaǵan tolyqmetrajdy «Er Tóstik pen Aıdahar» anımatsııalyq fılmi kórermen kóńilinen shyǵýda.

Týyndyny jaryqqa shyǵarǵan Sháken Aımanov atyndaǵy «Qazaqfılm» AQ-nyń baspasóz qyzmetiniń habarlaýynsha, qysqa merzim ishinde onyń kassalyq jıyny 31,3 mln. teńgeni qurady.

Uzaqtyǵy 67 mınýt bolatyn bul fılm 3 jyldan astam ýaqyt boıy ázirlendi. Onyń stsenarııin Jáken Dánenov, Rýstam Turalıev pen Mıhaıl Aldashın jazdy, rejısserlary - J. Dánenov pen R. Turalıev. Basty keıipkerlerdi dybystaýǵa Kádirbek Demesinov (Ernazar), Dýlyǵa Aqmolda (Er Tóstik), Lıdııa Kádenova (mystan), Kúnsulý Shaıahmetova (Bektory) syndy áıgili óner sheberleri shaqyryldy.

Jalpyulttyq prokat úshin fılmniń qazaq jáne orys tilderindegi 40 kóshirmesi jasaldy.