«Er Tarǵyn» jyry sandyq formatta jaryq kórdi
ALMATY. 18 qazan. QazAqparat /Erlik Erjanuly/ - «Jádiger» dástúrli óner klýby» qoǵamdyq qory «Er Tarǵyn» jyryn sandyq formatta jaryqqa shyǵardy.
Ideıa avtory jáne jobanyń kórkemdik jetekshisi Aqan Ábdýáliniń aıtýynsha, bul shara Mádenıet mınıstrliginiń qoldaýymen júzege asyp otyr. Uzaqtyǵy 1,5 saǵattan asatyn bul jyrdyń oryndaýshylary - Aqan Ábdýáli, Gúlmars Amanbaeva, Erbolat Shaldybekov, Rysbek Áshimov, Amandyq Kómekov, Amanqos Sadyqov men Baıan Musaeva. Olar buǵan deıin ony 2010 jyly Astana kúnine arnalǵan mádenı is-sharalar barysynda jyrlap shyqqan bolatyn.
Jalpy qazaq jyrynyń bul aýdıoantologııasy «Jádiger» dástúrli óner klýby júzege asyrǵan úshinshi joba bolyp otyr. Buǵan deıin olar «Alpamys batyr» men «Qyz Jibek» lıro-epostyq dastanyn qaıta jańǵyrtqan bolatyn. Ǵalym, saıahatshy Shoqan Ýálıhanov «qazaqtyń altyn ǵasyry» dep baǵalaǵan noǵaıly dáýiriniń tarıhı oqıǵalaryn beıneleıtin «Er Tarǵyn» jyrynyń bizdiń zamanymyzǵa 8 túrli nusqasy jetken. Olardyń ishinde eń tolyq, jáne kórkem nusqasy Marabaı aqyn jyrlaǵan úlgi. Ony N.Ilmınskıı jazyp alyp, 1862 jyly Qazanda jeke kitap etip bastyryp shyqqan bolatyn.
