Er-Rııadtaǵy kelissóz aıaqtaldy: Donald Tramp qalaı ótkenin aıtyp berdi

ASTANA. KAZINFORM – Tramp Saýd Arabııasyndaǵy kelissóz týraly aıtty, dep habarlaıdy BBC.

Amerıka úkimetiniń otyrysynda Tramp Saýd Arabııasynda ótip jatqan kelissóz barysy týraly aıtty. Onda AQSh delegatsııasy Ýkraına jáne Reseı ókilderimen bólek kezdesip jatyr.

– Dál qazir biz aýmaq týraly aıtyp otyrmyz. Biz demarkatsııalyq syzyq týraly aıtyp otyrmyz. Áńgime energetıka týraly, elektr stantsııasynyń menshigi týraly. Keıbir adamdar AQSh bul elektr stantsııasyna ıe bolýy kerek deıdi, óıtkeni bizde tájirıbe bar, - dedi Tramp.

Ótken aptada AQSh sheneýnikteri Ýkraınanyń atom elektr stansalarynyń qorǵalýyn qamtamasyz etý úshin olardy jeke menshikke alýdy usyndy. Buǵan jaýap retinde Zelenskıı atom elektr stantsııalarynyń memleketke tıesili ekenin, biraq Kıev Zaporoje atom elektr stantsııasyna amerıkalyq ınvestıtsııa salýdy qarastyrýy múmkin ekenin aıtty.

Sondaı-aq AQSh prezıdenti Donald Tramp Kıev pen Vashıngton jaqyn arada Ýkraınanyń sırek paıdaly qazbalardy birlesip óndirý týraly kelisimge qol qoıatynyna taǵy da ýáde berdi.

Eske salaıyq, 23 naýryzda Er-Rııadta AQSh pen Ýkraına delegatsııalarynyń kelissózi ótken bolatyn. Sonymen qatar Er-Rııadta Reseı Federatsııasy men AQSh delegatsııalary arasynda kelissóz bastalǵany týraly habarlaǵan bolatynbyz.