Er-Rııadta QR Táýelsizdiginiń 30 jyldyǵyna oraı saltanatty qabyldaý ótti
Saltanatty sharaǵa Er-Rııad qalasynyń meri, mártebeli hanzada Faısal ben Aııaf, Parsy shyǵanaǵy arab memleketteriniń yntymaqtastyq keńesiniń Bas hatshysy N. Hadjraf, SAK Konsýltatıvtik Keńesiniń depýtattary – Qazaqstan-Saýd parlamenttik dostyq tobynyń músheleri, Syrtqy ister mınıstrliginiń, Koroldiktiń memlekettik organ basshylary men ókilderi, shet elderdiń elshileri men dıplomattary jáne Er-Rııad pen Djıddadaǵy halyqaralyq uıymdardyń turaqty ókilderi, ǵylymı jáne iskerlik orta, qoǵam jáne saıası qaıratkerler, BAQ ókilderi, sondaı-aq belgili qoǵam-saıası qaıratkerleri qatysty.
Qazaqstan elshisi B.Aryn óz sózinde Táýelsiz Qazaqstannyń 30 jyl ishindegi negizgi jetistikterin atap ótip, qonaqtardy elimizdiń qazirgi saıası jáne áleýmettik-ekonomıkalyq ómiri týraly habardar etti. QR Tuńǵysh Prezıdenti – Elbasy Nursultan Nazarbaevtyń memlekettiń qalyptasýyndaǵy róline, sondaı-aq álemdik qoǵamdastyqtyń keń qoldaýyna ıe bolǵan onyń halyqaralyq bastamalaryna erekshe nazar aýdaryldy.
Sondaı-aq, elshi QR Prezıdenti Qasym-Jomart Toqaevtyń basshylyǵymen qazirgi ýaqytta júrgizilip jatqan ekonomıkalyq jáne saıası reformalar týraly aıtyp berdi.
Qazaqstandyq dıplomat Qazaqstan men Saýd Arabııasy arasyndaǵy qarym-qatynastardyń qarqyndy damyp, QR Prezıdenti Qasym-Jomart Toqaev pen SAK murager hanzadasy Muhammed ben Salman arasyndaǵy jeke baılanystyń, sondaı-aq SAK Konsýltatıvtik keńesiniń tóraǵasy Abdalla ash-Sheıhtiń jáne SAK ınvestıtsııalar mınıstri Halıd Falıhtyń Qazaqstanǵa saparynyń arqasynda osy jyly qarqyn alǵanyn tilge tıek etti.
Saltanatty qabyldaýǵa qatysýshylarǵa qysqa metrajdy derekti fılm kórsetilip, Qazaqstannyń Táýelsizdik jyldaryndaǵy jetistikteri týraly fotokórme uıymdastyryldy. Qazaqstannan onlaın rejıminde translıatsııalanǵan Súıinbaı atyndaǵy Almaty oblystyq fılarmonııasy orkestriniń kontserti keshti kórkeıte tústi. Qazaqstandyq ártister elshiliktiń saltanatty sharasyna qoldaý kórsetip, kópshilikke tanymal qazaq kompozıtorlarynyń shyǵarmalary men ulttyq folkloryn usyndy. Elshilik aýmaǵynda qazaqtyń kıiz úıi men kóshpendilerdiń qoldanbaly óneriniń ulttyq buıymdary qoıylǵan etnografııalyq kórme uıymdastyryldy.
Qabyldaý barysynda Elbasy Nursultan Nazarbaev pen QR Prezıdenti Qasym-Jomart Toqaevtyń kitaptary, sondaı-aq Qazaqstan týraly jáne onyń saıası jáne áleýmettik-ekonomıkalyq damýy, sondaı-aq Qazaqstan-Saýd qarym-qatynastary týraly baıandaıtyn ózge de aqparattyq-ımıdjdik materıaldar taratyldy.
Avtory: Arsen Óteshev
