Er-Rııad áýejaıynda asqazanyna esirtki salyp tasyǵan jolaýshy ustaldy
ASTANA. QazAqparat - Er-Rııad áýejaıynda jolaýshy 1 kelige jýyq geroın esirtkisin asqazanyna salyp, ony alyp ótpek bolǵan. Alaıda shekarashylar qylmyskerdi quryqtady. Bul týraly «Habar 24» jergilikti «Ál-Ihbarııa» telearnasyna silteme jasap habarlady.
Keden dırektory Sýltan ál-Fahıdtiń habarlaýynsha, kelip jetken reıstiń jolaýshysy tekserý kezinde kúdik týdyrǵan.
«Ony jeke tekserýden ótkizý barysynda asqazanyna 110 kapsýla geroın esirtkisin salyp alǵany belgili boldy. Qylmyskerge qatysty qajetti shara qolǵa alyndy», - dep málimdedi dırektor.
Ázirge reıstiń qaı elden jáne ustalǵan adamnyń qaı el azamaty ekeni naqty aıtylmaıdy. Aıta keteıik, Saýd Arabııasynda esirtki zattaryn qoldanǵan, ony saqtaǵan jáne saýdalaǵan adamǵa ólim jazasy taǵaıyndalady.
