Er-Rııad áýejaıyna jasalǵan jańa shabýyldan úsh adam qaza tapty
ASTANA. KAZINFORM — Saýd Arabııasynyń bıligi men ulttyq áýe tasymaldaýshysy Korol Halıd atyndaǵy halyqaralyq áýejaıǵa jasalǵan jańa shabýyldarǵa qatysty málimdeme jasady, dep habarlaıdy Kazinform agenttiginiń menshikti tilshisi.
Beısenbi kúni Er-Rııadtaǵy Korol Halıd atyndaǵy áýejaıǵa jasalǵan eki shabýyldan Saýd Arabııasynyń úsh azamaty qaza taýyp, birneshe adam jaraqat aldy.
Bul týraly juma kúni koroldiktiń Azamattyq avıatsııa bas basqarmasy jarııalaǵan málimdemede aıtylǵan.
#بيان بشأن استهداف مرافق مطار الملك خالد الدولي وطائرة تابعة للخطوط السعودية. #الطيران_المدني https://t.co/PPB2d6igZw
— هيئة الطيران المدني (@ksagaca) October 9, 2026
Vedomstvo málimetinshe, alǵashqy shabýyl áýejaı nysandaryna, al ekinshisi Saýd Arabııasynyń ulttyq áýe tasymaldaýshysy Saudia kompanııasynyń ushaǵyna baǵyttalǵan.
Jaralanǵandar arasynda Saýd Arabııasynyń azamattary men koroldikte turatyn sheteldikter bar. Zardap shekkenderdiń naqty sany aıtylmady. Olardyń jaraqaty jeńilden bastap aýyr, ómirine qaýip tóndiretin deńgeıge deıin jetedi. Barlyǵy aýrýhanaǵa jetkizilgen.
Materıal jarııalanǵan sátte Saýd Arabııasynyń Azamattyq avıatsııa bas basqarmasy jaralanǵandar arasynda Qazaqstan azamattarynyń bar-joǵy týraly Kazinform agenttiginiń saýalyna jaýap bermegen.
Saudia áýe kompanııasy óz qyzmetkerleriniń biri qaza tapqanyn jáne jerde turǵan ushaqtyń búlingenin rastady.
— Oqıǵa kezinde ushaq bortynda jolaýshylar bolǵan joq, — delingen áýe tasymaldaýshynyń málimdemesinde.
Obituary https://t.co/rQHVaVsCx9
— Saudia Group | مجموعة السعودية (@SaudiaGroup) October 9, 2026
Shabýyldardan keıin áýe kompanııasy tıisti organdarmen birlesip, shuǵyl áreket etý sharalaryn qolǵa aldy. Saudia málimetinshe, 8 qazan, beısenbi kúni jergilikti ýaqyt boıynsha saǵat 18:00–den bastap áýejaıdaǵy reıster men kompanııa jumysy qalypty kestege oralǵan.
Azamattyq avıatsııa bas basqarmasy áýejaı jumysy qaıta jandanyp, áýe qozǵalysy qalypqa kelgenin habarlady. Qazir mekeme keltirilgen shyǵyn kólemin anyqtap, áýejaı nysandarynyń qaýipsizdigin tekserip jatyr. Eki málimdemede de shabýyldy kimniń jasaǵany jáne qandaı qarý qoldanylǵany aıtylmaǵan.
Bul rette shabýyldardyń saldary halyqaralyq áýe qatynasyndaǵy reıster kestesine áser etip otyr.
Al Jazeera málimetinshe, 9 qazanda keminde 103 reıs toqtatylǵan. Al bir kún buryn bul kórsetkish 335-ke jetken. Er-Rııadqa baǵyt alǵan keıbir ushaqtar basqa áýejaılarǵa burylǵan.
Air India áýe kompanııasy Saýd Arabııasynyń astanasyna qatynaıtyn jáne keri baǵyttaǵy reısterdi demalys kúnderine deıin toqtatatynyn habarlady. Al Jazeera basylymynyń Reuters agenttigine silteme jasap jazýynsha, Lufthansa kompanııasy Er-Rııadqa ushatyn reısterin 16 qazanǵa deıin toqtatqan.
Bul jaǵdaı Iemendegi hýsıtter tobynyń Saýd Arabııasyna zymyran soqqylaryn kúsheıtip, eldiń áýe keńistigin jabýǵa áreket jasaýymen tuspa-tus keldi. Aımaqtaǵy ahýal AQSh pen Iran arasyndaǵy qaqtyǵystan týyndaǵan soǵystyń órshýine baılanysty odan ári shıelenisip otyr.
Hýsıtterge qatysy bar resmı tulǵalar men BAQ-tyń habarlaýynsha, jumaǵa qaraǵan túni Saýd Arabııasynyń áskerı ushaqtary Iemen astanasy Sana qalasyndaǵy hýsıtter nysandaryna soqqy jasaǵan. Al beısenbi kúni Saýd Arabııasynyń kúshteri Er-Rııadqa baǵyttalǵan eki ballıstıkalyq zymyrandy jáne Hamıs-Mýshaıt qalasyna qaraı ushqan taǵy bir zymyrandy qaǵyp túsirgen.
Eske sala keteıik, 7 qazanda Saýd Arabııasynyń bıligi 6-7 qazan kúnderi Abha jáne Korol Halıd atyndaǵy áýejaılarǵa eki bólek shabýyl jasalǵanyn habarlaǵan edi. Shabýyldardan Sýdan azamaty jáne Marokko men Aljırden kelgen eki áıel qaza taýyp, taǵy 36 adam jaraqat aldy.
