Er-Rııad áýejaıyna taǵy shabýyl jasaldy: ondaǵan adam jaraqat aldy
ASTANA. KAZINFORM – Saýd Arabııasynyń astanasy Er-Rııadtaǵy halyqaralyq áýejaıǵa 10 qazan, senbi kúni taǵy da shabýyl jasalǵany habarlandy. Oqıǵadan keıin áýejaı jumysy ýaqytsha toqtatyldy, dep habarlaıdy Euronews.
Aldyn ala málimet boıynsha, shabýylǵa Iemendegi hýsıtter qozǵalysynyń qatysy bolýy múmkin.
Euronews basylymynyń Saýd Arabııasy astanasyndaǵy aýrýhanalardyń birindegi derekkózi shabýyl saldarynan ondaǵan adamnyń jaraqat alǵanyn habarlady.
– Ondaǵan adam jaraqat aldy. Olardyń basym bóligi Saýd Arabııasynyń azamattary. Keminde bes adam jansaqtaý bóliminde jatyr, – dedi basylymnyń derekkózi.
Bul oqıǵa hýsıtter jaýapkershilikti óz moınyna alǵan Er-Rııad áýejaıyna jasalǵan aldyńǵy shabýyldardan eki kún ótken soń tirkeldi. Sol kezde úsh adam qaza tapqan bolatyn.
Saýd Arabııasynyń bıligi ázirge jańa shabýyl bolǵanyn resmı túrde rastaǵan joq. Alaıda birneshe kýáger senbi kúni Korol Halıd atyndaǵy halyqaralyq áýejaıdan adamdardyń evakýatsııalanǵanyn habarlady.
Áýejaı ákimshiligi jolaýshylarǵa reısteriniń mártebesin aldyn ala tekserýge keńes bergen.
Kýágerlerdiń biri ushaqqa otyrýdy kútip turǵan kezde jarylys daýysyn estigenin aıtsa, ekinshisi jarylysty óz kózimen kórgenin jáne adamdardyń jaraqat alǵanyn jetkizdi.
– Men ishki reıster termınalyndaǵy 403-shyǵý qaqpasynyń janynda turdym. 401-shyǵý qaqpasyna soqqy jasalǵanyn óz kózimmen kórdim. Dál aldymda jaralanǵan adamdar jatty. Barlyǵy jan-jaqqa qasha bastady, – dedi kýágerlerdiń biri.
Oqıǵadan keıin AQSh, Kanada, Germanııa jáne Ispanııanyń Saýd Arabııasyndaǵy elshilikteri óz azamattaryna ýaqytsha áýejaıǵa barmaýǵa keńes berdi.
Flightradar24 áýe reısterin baqylaý servısiniń málimetinshe, Er-Rııadqa baǵyt alǵan barlyq reıs basqa áýejaılarǵa jiberilgen nemese toqtatylǵan.
Sonymen qatar Kuwait Airways áýe kompanııasy qaýipsizdik jaǵdaıyna baılanysty Saýd Arabııasy astanasyna qatynaıtyn eki reısin toqtatqanyn málimdedi.
– Kuwait Airways 2026 jylǵy 10 qazan, senbi kúni Kýveıtten Er-Rııadqa ushatyn KU775 jáne Er-Rııadtan Kýveıtke baǵyttalǵan KU776 reısteriniń toqtatylǵanyn habarlaıdy. Buǵan qaýipsizdik jaǵdaıyna baılanysty áýejaıdyń jabylýy sebep boldy, – delingen kompanııanyń resmı málimdemesinde.
Buǵan deıin beısenbi kúngi shabýyldan keıin Air India, FlyDubai, Lufthansa Group jáne Pakistan International Airlines sııaqty birqatar áýe kompanııasy Saýd Arabııasynyń áýejaılaryna ushýdy ýaqytsha toqtatqan.
Hýsıtter halyqaralyq áýe kompanııalaryna Saýd Arabııasynyń áýe keńistiginde reısterdi jalǵastyrǵan jaǵdaıda yqtımal saldar bolatynyn eskertken.
Basylym málimetinshe, Iemendegi kóterilisshiler men Er-Rııad qoldaıtyn úkimet kúshteri arasyndaǵy qaqtyǵystardyń shıelenisýi aıasynda Saýd Arabııasynyń áýejaılary, munaı nysandary men tankerleri hýsıtterdiń shabýylyna jıi ushyrap otyr.
Aıta keteıik, buǵan deıin 8 qazanda Er-Rııadtaǵy Korol Halıd atyndaǵy halyqaralyq áýejaıǵa jasalǵan eki shabýyl saldarynan Saýd Arabııasynyń úsh azamaty qaza taýyp, birneshe adam jaraqat alǵan bolatyn.
