Er adamnyń kúshi judyryǵynda emes – Bas múftı
ASTANA.KAZINFORM - Bas múftı Naýryzbaı qajy Taǵanuly áleýmettik jelide áıelderge jasalatyn turmystyq zorlyq-zombylyqqa qatysty pikir bildirdi.
Bas múftı er azamattyń mindeti áıelge qorqynysh emes, qamqorlyq syılaý ekenin atap ótti.
– Keıde qoǵamda bolyp jatqan keıbir oqıǵalardy estigende júregiń aýyrady. Ásirese otbasynyń ishinde áıel adamnyń jábir kórip, qorlyqqa ushyraýy janǵa batady. Áıel – bir shańyraqtyń shyraǵy. Bireýdiń aıalap ósirgen qyzy, bireýdiń asyl anasy, bireýdiń súıikti jary. Ol jańa túsken shańyraǵyna qorǵanysh pen jylýlyq izdep keledi. Sondyqtan er azamattyń mindeti – oǵan qorqynysh emes, qamqorlyq syılaý. Ardaqty Paıǵambarymyz (oǵan Allanyń salaýaty men sálemi bolsyn): «Senderdiń eń jaqsylaryń – otbasyna jaqsy bolǵandaryń» degen. Osy bir ósıettiń ózinde úlken mán bar. Er adamnyń kúshi judyryǵynda emes. Naǵyz kúsh – ashýǵa erik bermeı, sabyr saqtaı bilýde. Janyńdaǵy jandy jylatpaı, kerisinshe oǵan súıenish bolýda, - dedi Naýryzbaı qajy Taǵanuly.
Bas múıýtı er-azamattardy amanatqa qııanat jasamaı, áıelge qorǵan bolýǵa shaqyrdy.
– Ashý basylady. Urys ta umytylady. Biraq ashýmen kóterilgen qol men aıtylǵan aýyr sóz adamnyń júreginde uzaq ýaqytqa iz qaldyrýy múmkin. Keıde sol bir sáttik ashýdyń ókinishi ómir boıyna jetedi. Otbasy adam ózin eń qaýipsiz sezinetin meken bolýy kerek. Áıel óz úıinde qorqyp emes, qadirlenip ómir súrýge tıis. Qyz balasyn aıalap ósirip, aq bosaǵadan úlken úmitpen shyǵaryp salǵan árbir áke men ananyń tilegi bireý: barǵan jerinde baqytty bolsyn. Sol amanatqa qııanat jasamaıyq. Áıeldi jylatý – azamattyq emes. Áıelge qorǵan bolý – erdiń mindeti, - dedi Bas múıýtı.
Aıta keteıik, Qostanaıda burynǵy áıelin qyzǵanyshtan atyp óltirgen er adam 12 jylǵa sottaldy.
Almatyda eks-polıtseı áıelin qatygezdikpen óltirgen.
Sonymen qatar qazir qoǵamda Jambyl oblysynyń Merki aýdanynda otbasylyq janjaldan keıin kóz jumǵan 19 jastaǵy Madına Rashıdqyzynyń oqıǵasy qyzý talqylanyp jatyr.
Osy iske qatysty polıtsııa tergeý jumystaryn bastady.
