Er adam aýyldasymen janjaldasyp, úıin órtep jibergen - SQO
PETROPAVL. QazAqparat – Soltústik Qazaqstan oblysynda aýyl turǵyny kórshileriniń birimen janjaldasyp, úıin órtep jiberdi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 10 mamyrǵa qaraǵan túni M.Jumabaev aýdany Qaraqoǵa aýylyndaǵy turǵyn úılerdiń birinen órt shyqqan. Órtten eshkim zardap shekken joq: sol kúni úı ıesi jalǵyzbasty 52 jastaǵy áıel tanysynyń úıinde túnegen eken.
Ol polıtseılerge jýyrda tanys adamymen janjaldasyp, onyń qoqan-loqy kórsetkenin aıtqan. Aýdandyq polıtsııa bóliminiń qyzmetkerleri de úıdiń qasaqana órtelgenin anyqtady.
Jedel-izdestirý is-sharalary barysynda buryn urlyq jasaǵany jáne aýyr dene jaraqattaryn keltirgeni úshin sottalǵan 42 jastaǵy jergilikti turǵynnyń qatysy bary rastaldy. Atalǵan fakti «Bótenniń múlkin qasaqana joıý nemese búldirý» baby boıynsha Sotqa deıingi tergep-tekserýlerdiń biryńǵaı tizilimine engizildi.
«Ustaý kezinde kúdikti mas bolǵan. Іshimdikti shamadan tys ishý kóbine adamdardy zań buzýǵa ıtermeleıdi. Kúdiktiniń aıtýynsha, aýlada turǵan dıvandaǵy jamylǵyny órtemek bolǵan, sol úshin ottyqty paıdalanǵan.
Atalǵan fakti boıynsha barlyq qajetti saraptamalar taǵaıyndaldy, bolǵan oqıǵanyń mán-jaıyn tolyq jáne jan-jaqty anyqtaýǵa baǵyttalǵan sotqa deıingi tergeý júrgizilip jatyr», - deıdi aýdandyq polıtsııa bóliminiń bastyǵy Qaırat Bımendın.
