Er adam áskerde zorlyq kórgenin aıtyp, jelide qarjylaı kómek suraǵan

ASTANA. KAZINFORM — Azamattar áskerdegi seksýaldyq zorlyq-zombylyq týraly jalǵan oqıǵaǵa senip qaldy. Degenmen alaıaqtyq pen jalǵan aqparat taratty dep kúdikke ilingen 23 jastaǵy astanalyq turǵyn ustaldy, dep habarlaıdy Polisia.kz.

23 aqpanda Threads áleýmettik jelisinde belgisiz akkaýnt arqyly bir jeli qoldanýshysy áskerde júrgeninde jynystyq zorlyq-zombylyqqa ushyraǵanyn jáne qazirgi ýaqytta qýdalaýdan qorqatynyn málimdegen. Ol bir jyl buryn áskerden oralǵanyn, biraq bolǵan sumdyq oqıǵany áli de umyta almaı júrgenin jazǵan.

Post avtorynyń sózinshe, komandıri ony qorqytyp, jynystyq sıpattaǵy áreketterge májbúrlegen. Jazbada jeli qoldanýshylarynyń nazaryn aýdaratyndaı egjeı-tegjeıli málimetter keltirilgen. Oqıǵanyń «qorqynyshty» tustaryn baıandaı otyryp, ol ózine qarjylaı kómek suraǵan, qaýip baryn alǵa tartyp, shetelge ketý qajettigin jetkizgen. Jarııalanymda bank rekvızıtteri qosa kórsetilgen.

Jınalǵan qarajatty shetelge shyǵý úshin jumsaıtynyn málimdegen. Sonymen qatar ol osy jaǵdaıdan keıin depressııaǵa túskenin jáne burynǵydaı qyzymen qarym-qatynasyn jalǵastyra almaıtynyn jazǵan. Alaıda shotty tekserý úshin polıtsııaǵa júgingen bir jeli qoldanýshysynyń qyraǵylyǵynyń arqasynda jazba avtorynyń jalǵan áreketteri áshkerelendi.

Jedel qyzmetkerlerge tek rekvızıtter ǵana emes, oqıǵanyń ózi de kúmándi kóringen. Barlyq kúdik esepshot ıesi — 17 jastaǵy jasóspirim ekeni anyqtalǵannan keıin rastaldy.

Onyń aıtýynsha, hostelde tanysqan burynǵy tanysy oǵan qaryzyn aýdarý úshin rekvızıtterin suraǵan. Sondaı-aq óz esepshottary buǵattalǵanyn aıtyp, basqa aýdarymdardy qabyldaýyn ótingen. Bul zańsyz áreketke sengen jasóspirim jeke derekterin berýge kelisken. Eki kúnniń ishinde onyń esepshotyna 100-den astam aýdarym túsken. Júrgizilgen jedel-izdestirý sharalary barysynda post avtory ustaldy.

— Jarııalanǵan aqparat shyndyqqa sáıkes kelmeıdi. Sonymen qatar onyń áskerı qyzmetke esh qatysy joq ekendigi jáne áskerde eshqashan bolmaǵany belgili boldy. Óziniń osy áreketimen ol áskerı qyzmettiń bedeline nuqsan keltirdi, — deıdi tártip saqshylary.

23 jastaǵy kúdiktiniń aıtýynsha, jalǵan aqparatty ol aqsha jınaý maqsatynda jarııalaǵan.

— Kórineý jalǵan aqparatty taratý jáne alaıaqtyq faktileri boıynsha qylmystyq ister qozǵaldy. Sotqa deıingi tergep-tekserý júrgizilýde, kúdikti ustalyp, ýaqytsha ustaý ızolıatoryna qamaldy. Sot sanktsııasymen ol qamaýǵa alyndy. Osyndaı aılasy úshin jigitke birneshe jylǵa deıin bas bostandyǵynan aıyrý jazasy qarastyrylady, — deıdi ІІM habarlamasynda.

Polıtsııa azamattarǵa jalǵan aqparat taratqany úshin jaýapkershilik baryn eske salyp, tek resmı derekkózderge ǵana senýge shaqyrady.

— Keıde mundaı oqıǵalardyń artynda jaı ǵana esep jatýy múmkin. Árdaıym teksergen abzal. Beıtanys adamdarǵa aqsha aýdarmańyzdar! — dep eskertti polıtseıler.

Osyǵan deıin aqmolalyq áıel jalǵan ınternet jeńildigine aldanyp, 5 mln teńgesinen qaǵylǵanyn jazǵanbyz.