Er adam Almatyda kópirden sekirýge árekettengen
ALMATY. QazAqparat – Jelide Almatyda er adamnyń jaıaý júrginshiler kópirine shyǵyp, sekirýge árekettengeni jaıly vıdeo paıda boldy. Polıtsııa departamenti bul oqıǵanyń mán-jaıy týraly málim etti, dep habarlaıdy QazAqparat tilshisi.
Beınejazbada keleńsiz jaǵdaıdyń Rysqulov dańǵyly men Shemıakın kóshesiniń qıylysynda bolǵany aıtylady. Onda er adamnyń aınalasynda kóp adamdardyń jınalǵany kórinedi.
«Er adam sekirýge tyrysyp jatyr. Eshqandaı kelissózderge kelmeı tur. Ózi jalańaıaq», - degen daýystar kadr syrtynan estiledi.
Qalalyq polıtsııa departamentiniń baspasóz qyzmeti abyroı bolǵanda, eshkim japa shekpegenin aıtty.
«Baqytymyzǵa oraı buǵan ýaqytynda tosqaýyl qoıyldy. Alǵashqy bolyp Jetisý aýdandyq polıtsııa basqarmasynyń polıtsııa psıhology dabyl qaqty. Ol jaqyn jerden ótip bara jatyp, polıtsııanyń barlyq kúshterin: jaqyn jerdegi patrýldik polıtsııanyń ekıpajdary men ýchaskelik ınspektorlardy tarta bildi.
Nátıjesinde, keıinirek belgili bolǵandaı, esirtkige mas bolǵan adam, jaıaý júrginshiler kópiriniń ústinen túsirildi. Onymen profılaktıkalyq áńgime júrgizildi. Ony jeke basyn anyqtaý úshin jáne odan ári medıtsınalyq tekserýden ótkizý úshin Jetisý aýdanynyń polıtsııa basqarmasyna jetkizildi», - dedi Almaty polıtsııa departamentiniń resmı ókil Saltanat Ázirbek.
