Epızootııa oshaǵy: Qaraǵandynyń Buqar jyraý aýdanynda karantındik shekteý alyndy

ASTANA. KAZINFORM — Epızootııa oshaǵy otandyq ázirlemeniń arqasynda joıyldy, dep habarlaıdy AShM baspasóz qyzmeti.

— Qaraǵandy oblysynyń Buqar jyraý aýdanynda jylqylarda epızootııalyq lımfangıttiń tirkelýine baılanysty engizilgen karantındik shekteýler resmı túrde alynyp tastaldy.
Aýrý oshaǵyn joıý barlyq tıisti qurylymdardyń: Veterınarııalyq baqylaý jáne qadaǵalaý komıtetiniń, ǵylymı mekemelerdiń, sondaı-aq jergilikti atqarýshy organdardyń jedel ári úılesimdi áreketteriniń nátıjesi boldy. Komıtet jetekshiligimen aýlalardy turaqty túrde dezınfektsııalaý, tabyndarǵa klınıkalyq tekserý júrgizý sııaqty jańa jaǵdaılardy der kezinde anyqtaýǵa baǵyttalǵan keshendi is-sharalar júzege asyryldy, — delingen mınıstrlik taratqan aqparatta.

Epızootııany joıýdaǵy sheshýshi faktor — «Bıologııalyq qaýipsizdik problemalarynyń ǵylymı-zertteý ınstıtýty» JShS ǵalymdary ázirlegen otandyq epızootııalyq lımfangıtke qarsy vaktsınany daıyndaý jáne qoldaný boldy.

2025 jyldyń mamyr–shilde aılary aralyǵynda jergilikti bıýdjet esebinen 2 494 jylqyǵa jappaı vaktsınatsııa jáne revaktsınatsııa júrgizildi. Jańa preparatty qoldaný ınfektsııa oshaǵyn oqshaýlaýǵa, janýarlarda turaqty ımmýnıtet qalyptastyrýǵa, aýdandaǵy epızootııalyq ahýaldy qalpyna keltirýge múmkindik berdi.

Komıtet epızootııalyq jaǵdaıǵa monıtorıng júrgizýdi, sondaı-aq janýarlardyń densaýlyǵyn qorǵaýǵa, asa qaýipti ınfektsııalardyń taralýyn boldyrmaýǵa jáne eldiń azyq-túlik qaýipsizdigin nyǵaıtýǵa baǵyttalǵan profılaktıkalyq sharalardy iske asyrýdy jalǵastyryp jatyr.

Osyǵan deıin habarlanǵandaı, Atbasarda Sibir jarasynan eki aýyl karantınge jabyldy.