Epılepsııamen aýyratyn balalarǵa dáriger taǵaıyndaǵan emdi ózgertýge bolmaıdy
ALMATY. 17 qańtar. QazAqparat - Epılepsııanyń sebep-saldaryn anyqtaý óte qıyn. Ol kóp jaǵdaıda ata-anaǵa baılanysty.
Bul týraly Almatyda ótken «Dıagnostıkanyń ınnovatsııalyq ádisteri jáne epılepsııadan emdeý. Psıhonevrologııalyq, neırohırýgııalyq qyzmetterdiń, SVS Nevro qoǵamdyq birlestiginiń epılepsııamen aýyratyn klıentterge kómek kórsetýdegi ózara árkettestigi» dep atalatyn 2 kúndik halyqaralyq kongreste aıtyldy.
«Epılepsııamen negizinen balalar nevrologtary aınalysady. Óıtkeni aýrýdyń bul túri 5 jasqa deıingi balalar arasynda jıi kezdesedi. Sondyqtan ony der kezinde anyqtap, emdemese onyń arty qaıǵyly jaǵdaıǵa ákelýi múmkin. Jalpy epılepsııanyń sebebi áli kúnge deıin beımálim. Ol óte sırek jaǵdaıda ǵana anyqtalady. Epılepsııanyń qazir genetıkalyq, ıaǵnı atadan balaǵa aýysatyn formasy dıagnostıkalanady. Kóp jaǵdaıda onyń qalaı paıda bolǵany jumbaq bop qalýda», - deıdi QR Shtattan tys bas balalar nevrology Altynshash Jaqsybaeva. Medıtsına ǵylymdary doktorynyń aıtýynsha, qazir álemde aýrýdyń qaıdan paıda bolǵanyn emes, qalaı emdeýge bolatynyn anyqtaýǵa mán berilýde. Óıtkeni epılepsııany emdeýge bolady. Alaıda ol uzaq merzimge sozylyp, ómir boıy júrgiziledi. Onda preparattardy durys tańdaý qajet jáne ony dárigerdiń nusqaýynsyz toqtatýǵa bolmaıdy. Keıde ata-analar balalardyń boıynan qandaı oń ózgeris baıqalsa da, óz betimen em jasap, preperattardy qabyldaýdy toqtatady. Bul jaǵdaıdan keıin bul preperattar naýqasqa áser etpeıtin bolady jáne ony aýystyratyn basqa dári-dármekti tabý óte qıyn.
Altynshash Haırýllaqyzynyń sózine qaraǵanda, qazirgi tańda dıagnostıka jaqsarǵanymen aýrýlar sany azaıǵan joq. Bul ahýal búkil álemge ortaq másele.
