Epıdjaǵdaı: Almatyda tumaýǵa baılanysty shekteýler engizile me

ALMATY. KAZINFORM — Elimizde JRVI juqtyrý jaǵdaılary jıileıtin epıdemıologııalyq maýsymnyń belsendi kezeńi bastaldy.

Bekitilgen erejelerge sáıkes, bir synypta JRVI-men aýyrǵandar sany 30%-dan asyp ketse, oqýshylary tolyqtaı ýaqytsha onlaın oqytý formatyna aýystyrylady.

Osy oraıda, agenttik saýalyna jaýap bergen Almaty ákimdigi qalada áli eshqandaı shekteýler engizilmeıtinin, al mektepterde oqytý rejımi ózgerissiz qalatynyn habarlady.

Almaty qalasynyń sanıtarııalyq-epıdemıologııalyq baqylaý departamentiniń málimetinshe, megapolıste qazirgi ýaqytta JRVI boıynsha epıdemıologııalyq jaǵdaı turaqty. Ótken aptada tumaýdyń 23 786 jaǵdaıy tirkelgen, bul onyń aldyńǵy aptamen salystyrǵanda 18,9%-ǵa joǵary (19 288 jaǵdaı). Aýrý juqtyrǵandardyń 63,4%-y balalar. Jalpy JRVI dıagnozymen 519 patsıent, pnevmonııamen 79 patsıent aýrýhanaǵa jatqyzylǵan.

— Jańa epıdmaýsym bastalǵaly beri JRVI-diń 113 390 jaǵdaıy tirkeldi. Bul ótken jylmen salystyrǵanda 9,6%-ǵa joǵary. Sondaı-aq A/H3N2 tıpti, ıaǵnı gonkong tumaýynyń 13 rastalǵan jaǵdaıy tirkeldi: áıelder arasynda — 12 jaǵdaı, áskerı qyzmetshiler arasynda — 1 jaǵdaı tirkeldi. Patsıentterge em taǵaıyndalǵan, jaǵdaılary qanaǵattanarlyq, — dep habarlady departamentten.

Sonymen qatar, sanıtarııalyq-epıdemıologııalyq baqylaý departamenti qaladaǵy 172 mektep synyptarynda aýrý juqtyrǵan oqýshylar úlesi 10,0%-dan tómen ekenin málimdedi.

Eske salaıyq, ShQO-da 23 mekteptiń 169 synyby onlaın oqytý formatyna kóshirildi.