Epıdemııalyq ahýal jaqsarsa, dástúrli oqytýǵa kezeń-kezeńimen kóshemiz – BǴM
NUR-SULTAN. QazAqparat – QR Bilim jáne ǵylym mınıstrligi epıdemııalyq ahýal jaqsarǵan jaǵdaıda dástúrli oqytý formatyna kezeń-kezeńimen kóshedi. Bul týraly QR Bilim jáne ǵylym vıtse-mınıstri Sholpan Qarınova aıtyp berdi, dep habarlaıdy QazAqparat.
«Eń aldymen, bul jaǵdaıda balalar men pedagogtardyń, jalpy halyqtyń densaýlyǵyn eskerýimiz qajet. Bilim berý salasyndaǵy quzyrly organ retinde mınıstrliktiń sapaly bilim men balalardyń densaýlyǵy arasynda teńgerim tabýy qajettigin, oǵan jaýapty ekendigimizdi túsinemiz. Sanıtarlyq-epıdemııalyq ahýalǵa qaraı ár aımaqta oqytý formatyn aýystyrý boıynsha sheshim qabyldanady. ıAǵnı, jalpy respýblıka boıynsha ortaq bir sheshim qabyldanbaıdy. Barlyǵy sanıtarlyq-epıdemııalyq ahýalǵa baılanysty bolady», - dedi vıtse-mınıstr «Atameken» UKP ótkizgen onlaın jınalysta.
Onyń aıtýynsha, mınıstrlik dástúrli oqytý formatyna kezeń-kezeńimen kóshý boıynsha jospar ázirlep qoıǵan.
«Eger sanıtarlyq jaǵdaı jaqsarsa, eń aldymen 1-5 synyptar oqý protsesine kirisedi. Bul ýaqytta 6-11 synyptar qashyqtan oqytylady. Jaǵdaı taǵy jaqsara tússe, 6-11 synyptar da shtattyq rejımge kóshiriledi. Mektepterde sanıtarlyq qaýipsizdik sharalary saqtalady», - dedi Sh. Qarınova.
