Epıdemııa kezinde elordada jedel járdem jumysy qalaı ózgerdi
NUR-SULTAN. QazAqparat - Qaladaǵy kúrdeli epıdemıologııalyq jaǵdaıǵa baılanysty jedel járdem shaqyrýlar sany artty, dep habarlaıdy elorda ákimdiginiń resmı saıty.
Nur-Sultandaǵy jedel járdem brıgadasynyń sany 150-ge deıin kóbeıtildi.
«Buryn bizdiń quramda 118 brıgada jumys istegen. Qońyraýlar sanynyń artýyna baılanysty biz olardyń sanyn 150-ge jetkizdik», – dedi qalalyq jedel járdem stantsııasynyń dırektory Murat Orazbaev.
Onyń aıtýynsha, kelesi aptada qaladaǵy medıtsınalyq kolledjderdiń 70 túlegi jedel járdem qyzmetine qabyldanady.
«Qalalyq jedel járdem stantsııasy táýlik boıy jumys isteıdi, qazir brıgadalarǵa úlken júkteme túsýde. Qońyraýlardy qabyldaýdy jaqsartý úshin biz 103 dıspetcherlerinen bes pýlt, al baılanys ortalyǵynan jeti pýlt qostyq», – dedi M.Orazbaev.
Sońǵy aptada Nur-Sultanda jedel járdem qyzmetine túsetin júkteme aıtarlyqtaı ósti: ótken táýlikte shaqyrýlar sany 4,5 myńǵa jetti (koronavırýsqa deıin 1-1,5 myń bolatyn). Bir aptada qyzmet kórsetilgen shaqyrýlar sany 18 myńǵa jýyq, ótken táýlikte – 2 800. Sonymen qatar, turǵyndar jedel járdemge telegram-boty arqyly da júgine alady.
Sondaı-aq, ahýaldyq ortalyq jumysyn bastady – mamandar bir mekemede naýqastardyń tolyp ketpeýi úshin olardy aýrýhanalarǵa taratady.
