Epıdemıologter Jańa jyl qarsańynda saqtyq sharalary týraly eskertti
ASTANA. KAZINFORM - QR DSM Sanıtarlyq-epdemıologııalyq baqylaý komıtetiniń habarlaýynsha, Jańa jyl merekesi qarsańynda, dástúrli túrde kópshilik is-sharalarmen, otbasylyq dastarqandarmen, taza aýadaǵy belsendi demalyspen jáne pırotehnıkalyq buıymdardy qoldanýmen qatar júretin bul kezeńde densaýlyq pen qaýipsizdikti saqtaý asa mańyzdy.
- Dál osy kúnderi taǵamnan ýlaný, pırotehnıkalyq buıymdardy qoldaný kezinde jaraqat alý, sondaı-aq úsik shalý men sýyq tııý jaǵdaılarynyń sany artady. Merekelik kúnder tynysh ári tótenshe jaǵdaılarsyz ótýi úshin aldyn alý sharalaryn saqtaý qajettigin eske salamyz,-deligen habarlama.
Taǵamnan ýlanýdyń aldyn alý
Azyq-túlik ónimderin tek senimdi saýda oryndarynan satyp alyńyz.
Árdaıym jaramdylyq merzimin, qaptamanyń bútindigin jáne saqtaý sharttaryn tekserińiz.
Tańbalanbaǵan nemese kúmán týdyratyn ónimderdi tutynbańyz.
Taǵam daıyndaý kezinde jeke gıgıena erejelerin saqtańyz.
Daıyn taǵamdardy tońazytqyshta saqtap, olardy bólme temperatýrasynda uzaq ýaqyt qaldyrmańyz.
Balalarǵa arnalǵan tátti syılyqtardyń sapasyna erekshe kóńil bólińiz.
Pırotehnıkany qaýipsiz paıdalaný
Pırotehnıkalyq buıymdardy tek mamandandyrylǵan dúkenderden satyp alyńyz.
Nusqaýlyqtyń, sapa sertıfıkatynyń jáne jaramdylyq merziminiń bar ekenine kóz jetkizińiz.
Zaqymdalǵan nemese jınaqtamasy tolyq emes buıymdardy qoldanbańyz.
Feıerverkterdi tek ashyq alańdarda, qaýipsiz araqashyqtyqty saqtaı otyryp jáne nusqaýlyq talaptaryna sáıkes iske qosyńyz. Jandyrylyp jatqan buıymnyń ústine eńkeımeńiz jáne iske qosylmaǵan pırotehnıkany qaıta jaǵýǵa áreket jasamańyz.
Balalarǵa feıerverkterdi óz betinshe qoldanýǵa qatań tyıym salynady.
Úsik shalý men sýyq tııýdiń aldyn alý
Aýa raıy jaǵdaıyn eskere otyryp, jyly kıinińiz.
Balalardyń bas kıim, qolǵap (nemese bııalaı), sharf jáne jyly aıaq kıim kıgenine kóz jetkizińiz.
Sýyqta uzaq júrmeı, jylyný úshin úzilister jasańyz.
Kıim men aıaq kıimniń qurǵaq bolýyn qadaǵalańyz.
Úsiktiń alǵashqy belgilerine nazar aýdaryńyz: teriniń bozarýy, shanshý, uıý sezimi.
- Qarapaıym erejelerdi saqtaý sizge Jańa jyl merekelerin qaýipsiz, jaıly ári jaqyndaryńyzdyń densaýlyǵyna qamqorlyqpen ótkizýge kómektesedi. Sizderge zor densaýlyq, amandyq jáne baqytty Jańa jyl tileımiz! Ózińizdi jáne jaqyndaryńyzdy saqtańyz!, - delingen komıtet taratqan habarlamada.
Osyǵan deıin Jańa jyl qarsańynda polıtsııa kúsheıtilgen rejımde jumys istep jatqany týraly jazdyq.
Sondaı-aq Jańa jyl túninde Qazaqstan qalalarynda aýa raıy qandaı bolatynyn habarladyq.