Epıdemıologııalyq ahýal kúrdeli: DSM qyzylsha órship turǵan óńirlerdi atady
ASTANA. KAZINFORM — Qazaqstanda qyzylshaǵa qarsy profılaktıkalyq jáne epıdemııaǵa qarsy sharalar kúsheıtildi, dep habarlaıdy Densaýlyq saqtaý mınıstrliginiń baspasóz qyzmeti.
Búgin Densaýlyq saqtaý mınıstrliginde vedomstvo basshysy Aqmaral Álnazarovanyń tóraǵalyǵymen ákimderdiń orynbasarlarynyń, oblystardyń, respýblıkalyq mańyzy bar qalalardyń densaýlyq saqtaý basqarmalarynyń jáne aýmaqtyq sanıtarııalyq-epıdemıologııalyq baqylaý departamentteri basshylarynyń qatysýymen qyzylsha boıynsha epıdemıologııalyq ahýal máseleleri jónindegi respýblıkalyq shtabtyń otyrysy ótti.
Shtab barysynda qyzylshamen syrqattanýshylyq boıynsha aǵymdaǵy jaǵdaı, aldyn alýdy kúsheıtý jáne halyqty vaktsınatsııalaýmen qamtýdy arttyrý boıynsha qabyldanyp jatqan sharalar men qosymsha qadamdar qaraldy.
Densaýlyq saqtaý mınıstrligi barlyq qajetti profılaktıkalyq jáne epıdemııaǵa qarsy is-sharalardy iske asyryp jatyr.
— Sonymen qatar, jaǵdaıdy tolyq turaqtandyrýǵa áli qol jetkizilgen joq. Infektsııanyń taralýynyń negizgi sebebi áli de vaktsınatsııalaýdan bas tartý bolyp otyr. Densaýlyq saqtaý mınıstrliginiń derekteri boıynsha ótken jyldyń sońynan bastap elde qyzylshamen syrqattanýshylyqtyń ósýi baıqalady. Epıdemıologııalyq taldaý kórsetkendeı patsıentterdiń kópshiligi vaktsınatsııalanbaǵan azamattar. Sonymen, patsıentterdiń 79%-y vaktsınatsııalanbaǵan, taǵy 8,4%-y tolyq emes ımmýndaý kýrsyn alǵan, 10%-nyń ımmýndyq mártebesi belgisiz. Vaktsınatsııalanbaǵan balalardyń shamamen 59%-y ata-analarynyń sheshimi boıynsha vaktsınatsııalaýdy almaǵany erekshe alańdaýshylyq týdyrady, — delingen habarlamada.
Bıylǵy jyldyń basynan bastap respýblıkada qyzylshanyń 1 951 jaǵdaıy tirkeldi.
Naýqastardyń eń kóp sany:
- Astana qalasynda — 581 jaǵdaı,
- Jambyl oblysynda — 339,
- Almaty qalasynda — 317,
- Almaty oblysynda — 146 jaǵdaı tirkeldi.
Qyzylsha eń juqpaly vırýstyq aýrýlardyń biri bolyp qala beredi. Vaktsınatsııalaý bolmaǵan jaǵdaıda aýrý aýyr bolýy jáne — pnevmonııa, estý qabiletiniń joǵalý qaýpi bar otıt, nerv júıesiniń zaqymdanýy, sonyń ishinde entsefalıt jáne sırek jaǵdaılarda ólimge ákeletin aýyr asqynýlarǵa ákelýi múmkin. Sonymen qatar, qyzylshadan keıin adamnyń ımmýndyq júıesi uzaq ýaqyt boıy álsireıdi.
— Jas balalar, vaktsınatsııalanbaǵan eresekter, júkti áıelder, sondaı-aq sozylmaly aýrýlary bar jáne ımmýnıteti tómen adamdar úlken qaýipke ushyraıdy. Júkti áıelderde qyzylsha túsik tastaýǵa, merziminen buryn bosanýǵa jáne aýyr asqynýlarǵa ákelýi múmkin. Qyzylshanyń aldyn alýdyń jalǵyz senimdi ádisi — vaktsınatsııalaý. Vaktsınatsııalaý ońaı, qolaısyz kórinistersiz, ınfektsııadan jáne onyń aýyr zardaptarynan tıimdi qorǵaıdy, — dep túsindirdi mınıstrlik.
Densaýlyq saqtaý mınıstrligi ata-analarǵa balalardyń egý mártebesin tekserýdi jáne Ulttyq profılaktıkalyq egý kúntizbesine sáıkes ýaqtyly vaktsınatsııalaýdy usynady. Vaktsınatsııalaý týraly tolyq aqparatty EGU.KZ saıtynan jáne 7701 nómiri boıynsha alýǵa bolady.