Epıdemıolog koronavırýsty kóbinese kimder juqtyratynyn aıtty

ALMATY. QazAqparat - Almatyda negizinen 20-39 jas aralyǵyndaǵy turǵyndar koronavırýs ınfektsııasyn juqtyryp jatyr. Bul týraly Almaty qalasy sanıtarlyq-epıdemıologııalyq baqylaý departamenti basshysynyń orynbasary Ásel Qalyqova aıtty.

Sońǵy eki aptada almatylyq epıdemıologtar júrgizgen taldaý nátıjeleri boıynsha eń kóp syrqattaný eńbekke qabiletti jastaǵy adamdar arasynda tirkelgen.

«14 jasqa deıingi balalar arasynda aýrý kórsetkishi 3,3%-ǵa ósti. Bul mektepter men otbasylardaǵy ınfektsııalardyń saldary. Kóbinese 20-39 jastaǵy azamattar koronavırýs ınfektsııasyn juqtyrady, olardyń úlesi - 28%, 40-59 jasynda - 22% jáne 60 jastan asqan adamdar - 23%», - dedi Ásel Qalyqova.

Sonymen qatar ol ınfektsııany tejeý qıyn bolǵanymen, tıisti sharalar men ózin-ózi tárbıeleý oryndalsa, vırýstan saqtanýǵa bolady degen oıda. Ol úshin azamattar áleýmettik qashyqtyqty saqtap, jeke qorǵanys quraldaryn qoldanyp, adamdar kóp jınalatyn jerlerge barmaýy qajet.

Epıdemıolog sondaı-aq Almatyda koronavırýs ınfektsııa taraıtyn yqtımal oryndardy atady.

Mysaly, saýda oryndarynda ınfektsııany juqtyrý 3%-ǵa, azyq-túlik bólshek saýda jelilerinde, sýpermarketterde - 2,5%-ǵa, azyq-túliktik emes dúkenderde - 1,7%-ǵa, metroda - 0,6%-ǵa, qoǵamdyq tamaqtaný oryndarynda - 0,8%-ǵa, monsha-saýnalarda - 0,5%-ǵa kóterilgen. Sonymen qatar dárihana, medıtsınalyq mekeme, bank, poshta, demalys saıabaqtary sııaqty nysandarda 0,1%-ǵa ósken.

«Búginde ınfektsııany juqtyratyn negizgi oryndary saýda nysandary - 35%, qoǵamdyq kólikter - 19%, otbasylarmen baılanys - 18,4%, bazarlar - 9%», - dedi ol.

Buǵan deıin ol Almatyda qazan aıynda KVI juqtyrýshylar sany táýligine 40-qa deıin tómendeıtinin boljady.