Epıdemıolog koronavırýsqa qarsy býsterlik vaktsınany usyndy

ALMATY. QazAqparat- Koronavırýstyń revaktsınatsııasy tıimdi jáne ınfektsııanyń paıda bolý qaýpin birneshe ese azaıtady. Bul týraly Óńirlik kommýnıkatsııalar qyzmetiniń brıfınginde Almaty qalasynyń shtattan tys bas epıdemıology, Ortalyq qalalyq klınıkalyq aýrýhana dırektorynyń orynbasary Elvıra Ibragımova aıtty, dep habarlaıdy QazAqparat tilshisi.

Epıdemıologtyń sózinshe, qaladaǵy vaktsınalardyń barlyǵy qozdyrǵyshqa qarsy ımmýnıtetti qalyptastyryp, barlyq shtamdardan qorǵanýda joǵary tıimdilikti kórsetti.

Ol sondaı-aq halyqty úshinshi vaktsınany saldyrýǵa shaqyrdy.

«Vaktsınatsııa ótken jyly bastaldy, medıtsına qyzmetkerleri men polıtsııa qyzmetkerleri aqpan aıynda egildi. Jappaı egý sáýir aıynda bastaldy. Ýaqyt óte kele kúsheıtý dozasy qajet boldy, óıtkeni shtamm mýtatsııaǵa ushyrady. Qazir biz bir jyl buryn egilgenderge tórtinshi jáne besinshi ekpelerdi usynamyz», - dedi ol.

Brıfıng barysynda spıker «kentavr» koronavırýsynyń shtammy el aýmaǵynda tirkelmegenin aıtty.

«Zerthanalar rettilik boıynsha jumysty jalǵastyrýda, eger jańa shtammdar anyqtalsa, bul týraly habarlanady»,- deıdi dáriger. Sondaı-aq ol koronavırýs indeti tolqyn tárizdi sıpatqa ıe ekenin, álemde epıdemıologııalyq ahýal áli de turaqtalmaǵandyǵyn jetkizdi. Osy jyldyń naýryz aıynan bastap dert juqtyrýdyń tómendeýi baıqalǵan. Sáýir jáne mamyr aılarynda jeke jaǵdaılar tirkeldi. Biraq shilde aıynyń basynda juqtyrǵandar sanynyń ósýi qaıtadan bastaldy. «Biz osy ýaqytta statsıonarǵa kelip túsken naýqastarǵa monıtorıng júrgizdik jáne 70%-y vaktsınalanbaǵanyn anyqtadyq. Olardyń arasynda qatar júretin aýrýlardyń bolýyna baılanysty qorqyp, ekpe almaǵan zeınetkerler de boldy. Biraq barlyq emhanalyq mekemeler, kerisinshe, sozylmaly aýrýlary bar adamdardy eń aldymen koronavırýsqa qarsy vaktsınalanýǵa shaqyrady», - dedi Elvıra Ibragımova.

Epıdemıolog saqtyq sharalaryn saqtaý mańyzdy ekenin taǵy da eske saldy. Qoǵamdyq oryndarda maska kııý – tynys joldarynyń ınfektsııasy men koronavırýs aýrýyn azaıtýǵa kómektesetin mańyzdy jáne tıimdi shara. Almaty qalalyq qoǵamdyq densaýlyq saqtaý basqarmasynyń málimetinshe, keshe megapolıste koronavırýs ınfektsııasyn juqtyrýdyń 79 jaǵdaıy tirkelgen, onyń 71-i sımptomdy. Qazirde ınfektsııalyq statsıonarlarda 500 tósek-oryn bolsa, 68 adam fızıkalyq turǵyda jatyr. Osy ýaqytta úıde mobıldi brıgadalar men Telemedıtsına ortalyǵynyń baqylaýynda 656 patsıent bar.

Sondaı-aq vedomstvo 16 tamyzdaǵy jaǵdaı boıynsha vaktsınalanǵan almatylyqtardyń sany týraly aıtty. Ótken táýlikte birinshi komponentpen – 134 adam, ekinshi komponentpen – 238 adam vaktsınalandy. 738 adam revaktsınatsııadan ótti.

Almatyda 88 ekpe pýnkti jumys isteıdi, oǵan 300-den astam medıtsına qyzmetkeri jumyldyrylǵan. Elvıra Ibragımova elimizde vaktsınatsııa áli de tegin júrip jatqanyn atap ótti.