Epıdemıolog almatylyqtardy omıkron shtamy kelgenge deıin vaktsına alýǵa shaqyrdy
ALMATY. QazAqparat - Almaty qalasy sanıtarııalyq-epıdemıologııalyq baqylaý departamenti basshysynyń mindetin atqarýshynyń orynbasary Sádýaqas Baıǵabylov onlaın brıfıng barysynda almatylyqtardy «Omıkron» shtamy kelgenge deıin vaktsına alýǵa shaqyrdy, dep habarlaıdy QazAqparat tilshisi.
Epıdemıolog Jańa jyl merekesi qarsańynda koronavırýs ınfektsııasynyń taralý qaýpi artatynyn aıtty.
Sonymen qatar, ol KVI-diń basqa nusqalaryna qaraǵanda jańa «Omıkron» shtamy birneshe ese tez taralatynyn eske saldy.
«Tek 3 jeltoqsannan bastap Almatyǵa «Omıkron» shtamy tirkelgen elderden, atap aıtqanda Aýstralııa, Belgııa, Ulybrıtanııa, Germanııa, Egıpet, Izraıl, Italııa, Kanada, Nıderland, Chehııadan 3 678 avıajolaýshy keldi. Olardyń qoldarynda PTR taldaýynyń teris nátıjeleri boldy. Ázirge jańa mýtatsııa tabylǵan joq»,- dedi ol.
Sonymen qatar, ol qala turǵyndary sanıtarlyq normalardy saqtaý máselelerine jaýapkershilikpen qaraý kerek ekenin basa aıtty.
«Jańa jylda demalys kezinde elden ketpeý, bul kúnderdi otbasyńyzben ótkizgen durys, jabyq úı-jaılarǵa, adamdar kóp jınalatyn oryndarǵa barýdan bas tartý, betperde kııý usynylady», - deıdi Sádýaqas Baıǵabylov.
Ol megapolıs turǵyndaryn vaktsınatsııa pýnktterine kelip, «Omıkron» shtamy paıda bolǵan jaǵdaıda aǵzany qorǵaı alatyn koronavırýs vaktsınasyn saldyrýǵa shaqyrdy.
Onyń aıtýynsha, Almatyda koronavırýsqa qarsy vaktsınalar indettiń jańa nusqasynan da qorǵaıdy.
Sanıtarlyq dárigerlerdiń epıdemıologııalyq tájirıbesi kórsetkendeı, vaktsınalanǵan adamdar múldem aýyrmaıdy nemese ınfektsııany jeńil túrmen aýyrady.
