EPAM qazaqstandyq keńsesin 10 myń qyzmetkerge deıin keńeıtpek
«Jaqynda AQSh-ta bolǵanymda Microsoft, EPAM, Coursera sııaqty kompanııalardyń basshylyǵymen kezdesýler ótkizdim. Qazaqstanmen yntymaqtastyqty tereńdetý jáne bizdiń elde oqshaýlaý týraly naqty kelisimderge qol jetkizildi», - dedi Qazaqstan Prezıdenti «Digital Bridge 2022» halyqaralyq tehnologııalyq forýmy barysynda.
Memleket basshysy amerıkalyq birqatar kompanııa Qazaqstandaǵy keńsesin keńeıtýge nıetti ekendigin jetkizdi.
«Máselen, EPAM qazaqstandyq keńsesin 10 myń qyzmetkerge deıin keńeıtýdi, al álemdegi eń iri Binance krıptobırja Qazaqstanda búkil óńir úshin hab qurýdy josparlap otyr», - dedi Qasym-Jomart Toqaev.
Atalǵan kompanııa 1993 jyly Amerıkada qurylǵan, ataýy Effective Programming for America degen sózderdiń qysqarǵan túrinen shyqqan.
Baǵdarlamalyq qamtamasyz etý, konsaltıng qyzmetterin kórsetedi. 40-tan astam elde, sonyń ishinde Qazaqstanda ókildigi bar.
