EO Tramptyń jańa salyqtarynan bas tartýynan keıin AQSh-pen kelisimdi ratıfıkatsııalaıdy
ASTANA. KAZINFORM — Brıýsselde ótken tótenshe sammıtte EO músheleri AQSh-pen tarıftik kelisimdi ratıfıkatsııalaýdy jedeldetý týraly sheshim qabyldady, dep habarlaıdy TASS.
2025 jyldyń shildesinde Eýropalyq Komıssııanyń prezıdenti Ýrsýla fon der Lıaıen men AQSh prezıdenti Donald Tramp qol qoıǵan kelisim amerıkalyq taýarlarǵa nóldik baj salyǵynyń ornyna AQSh-qa eksporttalatyn barlyq eýropalyq taýarǵa 15% tarıf salýdy kózdeıdi.
Kelisimniń bóligi retinde EO aldaǵy úsh jylda AQSh-tan 750 mıllıard eýroǵa energııa satyp alýǵa jáne AQSh ekonomıkasyna iri ınvestıtsııalar salýǵa mindetti.
Eýropalyq Keńestiń prezıdenti Antonıo Kosta Tramptyń EO elderine qarsy jańa tarıfterden bas tartý týraly sheshimi «durys baǵyttaǵy qadam» ekenin atap ótti. Ol jańa bajdar burynnan qol qoıylǵan tarıftik kelisimge sáıkes kelmeıtinin málimdedi.
— Maqsat EO men AQSh arasyndaǵy saýda qatynastaryn turaqtandyrý bolýy kerek. Biraq EO óz múddelerin berik qorǵaýǵa nıetti, — dep atap ótti Kosta.
Keńes prezıdenti ózara múddeli barlyq másele boıynsha, ásirese Ýkraına boıynsha AQSh-pen belsendi yntymaqtastyqqa daıyn ekenin alǵa tartty.
Ol EO men AQSh uzaq ýaqyt boıy seriktester men odaqtastar bolyp, «qundylyqtarǵa negizdelgen transatlantıkalyq qaýymdastyq» qurǵanyn eske saldy.
— Biz odaqtastar men seriktester arasyndaǵy qarym-qatynas qurmet rýhynda saqtalýy kerek dep sanaımyz. Eýropa men AQSh Arktıka qaýipsizdigine jáne NATO sheńberindegi birlesken is-qımylǵa ortaq múddeli, — dep atap ótti Eýropalyq Keńes basshysy.
Kosta sonymen qatar Danııa men Grenlandııa EO-nyń tolyq qoldaýyna ıe ekenin jáne tek osy elderdiń halyqtary ǵana óz isterin sheshýge quqyly ekenin, Eýropalyq Odaqtyń bolashaq áreketteri osy erejege negizdeletinin atap ótti.
Esterińizge sala keteıik, Grenlandııany AQSh-qa berýge qarsylyq tanytýyna jaýap retinde AQSh-tyń jańa tarıfter engizý týraly málimdemesine fon der Lıaıen múshesi sanalatyn EO-nyń jetekshi saıası partııasy, Eýropalyq halyq partııasy, tarıftik kelisimdi ratıfıkatsııalaýdan bas tartý nıetin málimdedi.
Buǵan deıin Eýroparlament Ýrsýla fon der Lıaıen basqaratyn Eýropalyq komıssııa tóraǵasyna qatysty kezekti senimsizdik votýmyn qabyldamady.