EO syrtqy ister mınıstrleri Ortalyq Azııadaǵy áriptesterimen kezdesedi
ASTANA. KAZINFORM — EO syrtqy ister jáne qaýipsizdik saıasaty jónindegi joǵarǵy ókili Kaıa Kallas búgin Eýropa astanasynda EO syrtqy ister mınıstrleri Ortalyq Azııa, Ońtústik Kavkaz jáne Qara teńiz aımaǵyndaǵy áriptesterimen kezdesetinin málimdedi.
Onyń aıtýynsha, kezdesý Qara teńiz qaýipsizdigi jáne baılanystardy odan ári damytý máselelerine arnalady.
— Barlyq el energetıkalyq portfelderin, saýda joldaryn jáne jetkizý tizbekterin ártaraptandyrýǵa áreket etip keledi. Biz birge taǵy ne isteı alamyz? — dep atap ótti Kallas mınıstrlerdiń qatysýyn quptap.
Kezdesý EO Syrtqy ister keńesinde ótedi, oǵan EO-ǵa múshe 27 memlekettiń syrtqy ister mınıstrleri qatysady.
Búgin Ortalyq Azııa elderiniń, sonyń ishinde Qazaqstan, sondaı-aq Ońtústik Kavkaz, Moldova, Túrkııa jáne Ýkraınanyń ókilderi qatysady dep josparlanyp otyr. Kezdesýde kólik jáne logıstıkalyq baılanystardy, energetıkalyq qaýipsizdikti jáne Transkaspıı halyqaralyq kólik baǵyty aıasyndaǵy tsıfrlyq dálizderdi nyǵaıtýǵa basa nazar aýdarylady.
Syrtqy ister keńesiniń kún tártibinde Sırııa men Taıaý Shyǵystaǵy jaǵdaıdy, sondaı-aq Ýkraınaǵa qatysty máselelerdi talqylaý da bar.
Kaıa Kallas EO Sırııamen qarym-qatynasyn basqa Jerorta teńizi elderimen qarym-qatynasyna uqsas seriktestik deńgeıine kóterýdi kózdep otyrǵanyn atap ótti.
Buǵan deıin Eýropa odaǵynyń kóshbasshylary Dýblınde JI máselesin alǵash ret talqylaǵanyn habarlaǵan edik.