EO men AQSh saýda kelisimi boıynsha jumysyn jedeldetedi

ASTANA. KAZINFORM — Eýrokomıssııa tóraǵasy Ýrsýla fon der Lıaıen Kanadadaǵy G7 sammıtinde AQSh prezıdenti Donald Tramppen negizgi saýda máselelerin talqylaǵanyn jáne tarıf boıynsha kelisimge kelý úshin jumys toptaryna kelissóz protsesin jedeldetýdi tapsyrǵanyn aıtty, dep habarlaıdy Anadoly.

Sammıtke qatysqannan keıin áleýmettik jelidegi jazbasynda Ýrsýla fon der Lıaıen sammıt seriktester arasynda tereń jáne syndarly talqylaýǵa múmkindik bergenin atap ótti.

— Men prezıdent Tramppen Ýkraınadaǵy jaǵdaıdan bastap saýdaǵa deıingi mańyzdy máselelerdi talqyladym, — dedi ol.

Eýrokomıssııa tóraǵasy jumys toptaryna ádil jáne ózara tıimdi saýda kelisimine qol jetkizý úshin jumysyn jedeldetýdi tapsyrǵanyn qosa aıtty.

2 sáýirde Tramp ondaǵan elge, sonyń ishinde EO memleketterine 10-nan 50 paıyzǵa deıin ımporttyq baj salyǵyn engizetinin málimdedi. Keıinirek ol 75-ten astam el úshin tarıfterdi 90 kúnge keshiktirýge sheshim qabyldady. Sonymen qatar, AQSh bolat, alıýmınıı jáne týyndy ónimderge, sondaı-aq EO-dan keletin kólikterge 25 paıyzdyq baj salyǵyn engizdi. Buǵan jaýap retinde Eýropalyq Odaq amerıkalyq taýarlardyń eksportyna qarsy sharalar engizý josparyn jarııalady.

23 mamyrda AQSh prezıdenti Donald Tramp 1 maýsymnan bastap EO taýarlaryna 50 paıyzdyq baj salyǵyn engizý nıeti týraly málimdedi, biraq fon der Lıaıenmen telefon arqyly sóıleskennen keıin AQSh bul tarıfterdi engizýdi 9 shildege qaldyrý týraly sheshim qabyldady. Osy ýaqyttyń barlyǵynda taraptar kelisim boıynsha belsendi kelissóz júrgizdi.