EO qorǵanys tehnologııalaryn damytýdy jedeldetý baǵdarlamasyn iske qosty
ASTANA. KAZINFORM — Eýropalyq Odaq (EO) komıssııasy qorǵanys tehnologııalaryn ázirleý men engizýdi jedeldetýge baǵyttalǵan quny 115 mln eýro bolǵan jańa baǵdarlamany usyndy, dep habarlaıdy Anadolu aqparat agenttigi.
Komıssııanyń jarııalanǵan «AGILE» baǵdarlamasy qorǵanys salasynda shaǵyn jáne orta kásiporyndar, startaptar jáne óziniń qyzmet aýqymyn keńeıtip otyrǵan kompanııalar ázirlegen tehnologııalardy qoldaýǵa baǵyttalǵan.
Baǵdarlama jasandy ıntellekt, kvanttyq tehnologııalar jáne ushqyshsyz basqarylatyn júıeler sııaqty salalarda tehnologııalardy ázirleý, synaqtan ótkizý jáne ornalastyrýdy jedeldetýge baǵyttalǵan.
Quny 115 mln eýro baǵdarlama aıasynda kompanııalarǵa jyldamyraq jáne ıkemdi qarjylandyrý usynylady. Granttar berý týraly sheshimder shamamen tórt aı ishinde qabyldanady dep shamalanyp otyr, al ázirlengen tehnologııalar qorǵanys salasynda bir-úsh jyl ishinde paıdalanýǵa jaramdy bolady.
AGILE aıasynda barlyǵy 20-dan 30-ǵa deıin jobany qoldaý josparlanyp otyr. Baǵdarlama aıasynda tıisti shyǵyndardyń 100%-yn jabý shamalanǵan.
Eýropalyq komıssııanyń atap ótýinshe, qazirgi ýaqytta Odaq elderindegi qorǵanys shyǵyndarynyń basym bóligi eń iri qorǵanys kompanııalaryna baǵyttalyp otyr.
Komıssııa Eýroparlament pen EO Keńesine baǵdarlamany iske asyrý úshin qajetti zańnamalyq baza boıynsha usynys jasady. Bul usynys qabyldanǵan jaǵdaıda baǵdarlama 2027 jyldyń basynda kúshine enedi dep kútilip otyr.
Budan buryn Eýroodaq Lıvandaǵy jaǵdaıǵa qatysty málimdeme jasaǵanyn jazǵanbyz.
